Bayraqdar.info – AMEA Arxeologiya, Etnoqrafiya və Antropologiya İnstitutu və Azərbaycan Tibb Universiteti (ATU) birlikdə “Anatomiya muzeyi”nin sərgisində təmsil olunan Son Tunc – Orta Əsr dövrlərinə aid insan kəllələrinin tədqiqatlarını aparıb. Tədqiqatı AMEA AEAİ-nin aparıcı elmi işçisi, tarix üzrə fəlsəfə doktoru, dosent Dmitriy Kiriçenko və ATU-nun “İnsan anatomiyası və tibbi terminologiya” şöbəsinin müdiri vəzifəsini icra edən, tibb üzrə fəlsəfə doktoru Anar Abdullayev həyata keçirib.
Məlumat bayraqdar.info-ya oktyabrın 25-də AMEA AEAİ-nin İcitmiayyətlə əlaqələr şöbəsindən verilib.
“Alimlər Mingəçevir, Xaçbulaq (Daşkəsən rayonu), Xınıslı (Şamaxı), Kuxuroba (Qusar rayonu), Canaxar (Xaçmaz rayonu) nekropollarından, Göygöl rayonundakı kult kurqanından, Sarıtəpə (Qazax rayonu) məskənindən tapılmış kəllələri tədqiq ediblər. Göygöl rayonundakı Son Tunc – İlk Dəmir dövrünə aid kult kurqanından və eramızın ilk əsrlərinə aid katakomb dəfnlərindən aşkar edilmiş kəllələrdəki simvolik trepanasiyalar (qədim dini baxışlarla əlaqədar kəllə sümüyünün dəlilməsi) xüsusi maraq doğurub. Bəzi kəllələrdə travmatik zədələr və patologiyalar da izlənilir.
“Tədqiqatın nəticələri əsasında elmi nəşrlər hazırlanacaq. D.A.Kiriçenko və A.S.Abdullayev hələ XX əsrin 70-ci illərində Azərbaycanda mövcud olmuş müxtəlif elm sahələrinin (tarix, arxeologiya, antropologiya, tibb) qarşılıqlı işbirliyi ənənəsini bərpa etməkdədirlər”, – deyə məlumatda bildirilir.
