Bayraqdar.info – Öz fəaliyyətini uğurla davam etdirən Eskişehir Azərbaycanlılar Dərnəyi həm də ölkəmizin dəyərlərinin, tarixinin, ədəbiyyatının, mədəniyyətinin, tanınmış şair və yazıçılarının təbliği istiqamətində davamlı addımlar atır. Elə artıq bir neçə ildir ki, Dərnək tərəfindən təşkil edilən “Çərşənbə söhbətləri” də (Çarşamba sohbetleri) məhz bu məqsədə xidmət edir.
Dərnəyin sədri Cavid Aydının bayraqdar.info-ya verdiyi məlumata görə, “Çərşənbə söhbətləri”nin növbəti mövzusu “Xəlil Rza Ulutürk” olub: “Bildiyiniz kimi Azərbaycanın görkəmli şairi Xəlil Rza Ulutürk oktyabrın 21-də anadan olub. Biz də həm bu tarixi, həm də bu günlərdə Azərbaycanın Dövlət Müstəqilliyinin Bərpasının 30-cu ildönümünün qeyd edildiyini nəzərə alaraq növbəti mövzumuzu istiqlal şairimizə həsr etdik. Beləliklə, oktyabrın 20-də Dərnəyimizdə ənənəvi “Çərşənbə söhbətləri” çərçivəsində türkoloq, Xəlil Rza Ulutürkün mənəvi nəvəsi Atabəy Barışın Xəlil Rza Ulutürkün həyat və yaradıcılığından bəhs edən məruzəsi dinlənildi”.
Cavid Aydın onu da bildirib ki, “Çərşənbə söhbətləri”ndə həmçinin bəzi elmi məsələlərə dair məruzə və müzakirələrin keçirilməsi də planlaşdırılır: “Bunda da məqsəd Eskişehirdə yaşayan, həmçinin təhsil alan gənclərə bilik və bacarıqlarının artırılması istiqamətində dəstək olmaqdır”.
