Bayraqdar.info – “Azərbaycan Xəzər Dəniz Gəmiçiliyi” QSC-nin (ASCO) donanmasının tərkibinin genişlənməsi və müasir gəmilər hesabına yenilənməsi daim diqqət mərkəzində saxlanılır. Prezident İlham Əliyevin tapşırığına əsasən bu sahədə mühüm işlər icra olunur. ASCO-nun sifarişi ilə Bakı Gəmiqayırma Zavodunda tikilən “Kəlbəcər” neftdaşıyan tankeri də bu istiqamətdə həyata keçirilən genişmiqyaslı tədbirlərin tərkib hissəsidir.”
Bu xəbəri oktyabrın 19-da bayraqdar.info-ya ASCO-dan veriblər.
ASCO-dan bildirilib ki, ötən ay Prezident İ.Əliyevin iştirakı ilə istifadəyə verilən “Kəlbəcər” tankerinin xarici sularda istismarına qərar verilib. Yükü dizel yanacağı olan tanker ilk səfərinə çıxıb. Gəmi Türkmənistanın Türkmənbaşı limanından Türkiyənin Gebze limanına doğru yola düşüb.
“Uzunluğu 141 metr, eni 16,9 metr olan yeni nəsil “Kəlbəcər” tankerinin daimi heyəti 15 nəfərdən ibarətdir. Dedveyti – yükgötürmə qabiliyyəti 7 min 800 ton olan tankerdə dünyanın aparıcı şirkətlərinin avadanlıqları quraşdırılıb.
“Yeni tanker Bakı Gəmiqayırma Zavodunun 2019-cu ildə təhvil verdiyi və hazırda Qara dəniz-Aralıq dənizi hövzələrində üzən “Laçın” tankeri ilə eyni tiplidir.
“Gəmi həm ölkənin beynəlxalq yükdaşımalarda mövqeyinin möhkəmlənməsində, həm bir bazardan asılılığın aradan qaldırılmasında, həm də xarici sularda Azərbaycanın təmsil və təbliğində mühüm rol oynayacaq. Bu baxımdan Prezidentin təşəbbüsü ilə tankerə “Kəlbəcər” adının verilməsinin də böyük rəmzi mənası var.
“Xatırladaq ki, ASCO-nun uzun fasilədən sonra Xəzərdənkənar beynəlxalq sularda fəaliyyəti İ.Əliyevin tapşırığı ilə 2014-cü ildə “Üzeyir Hacıbəyli” və “Natəvan” gəmilərinin alınması ilə bərpa olunub”, – deyə xəbərdə qeyd edilir.
