Bayraqdar.info – Respublika QİÇS-lə Mübarizə Mərkəzinin direktoru Famil Məmmədovun bildirdiyinə görə, 1987-ci ildən bu günədək Mərkəzdə 7 min 552 İİV infeksiyası ilə yaşayan xəstə qeydiyyatdadır. Onlardan 70 faizini kişilər təşkil edir.
Əvvəlcə QİÇS haqqında məlumat verən həkim bidlirir ki, İİV-infeksiyası – İnsanın immun çatışmazlığı virusu (İİV) tərəfindən törədilən immun sisteminin artan zədələnməsi ilə müşaiət olunan xronik infeksion xəstəlikdir.
“QİÇS (Qazanılmış İmmun Çatışmazlığı Sindromu) – İİV virusunun insanın immun sistemini zədələməsi nəticəsində opportunistik (fürsətçi) infeksiyalar yaxud onkoloji xəstəliklər şəklində ağır klinik əlamətlərlə təzahür olunan xəstəliyin 4-cü və ya sonuncu klinik mərhələsidir. Bu mərhələdə xəstələrdə immun (CD4) hüceyrələrinin miqdarı o səviyyəyə qədər azalır ki, hətta zəif patogen infeksiyalar da xəstənin həyatı üçün təhlükə yaradır.
“İİV infeksiyasına yoluxmanın üç yolu mövcuddur: cinsi yolla, hemotransmissiv yolu ilə (qan vasitəsilə).
“Bura İİV-ə yoluxmuş insanın qanının digərinə köçürülməsi, öncə İİV-li xəstədə tətbiq olunmuş və dezinfeksiya edilməmiş tibbi və məişət alətlərinin (şpris, iynə, ülgüc, stomatoloji, cərrahi, manikür, tatuaj, pirsinq alətləri və s.) təkrar istifadəsi nəticəsində olan yoluxmalar daxildir. Həmçinin, anadan uşağa (şaquli) ötürülmə nəticəsində: hamiləlik zamanı, doğuş vaxtı və körpənin döşlə qidalandırılması müddətində baş verir”, – deyə həkim bildirir.
Mərkəzin direktorunu sözlərinə görə, İİV infeksiyasına yoluxma əlamətləri ilk mərhələdə adi soyuqlama, qısa müddətli zökəm, bədən temperaturunun bir neçə gün subfebril olması ilə təzahür olunur və tamamilə keçir. İlkin klinik əlamətlərə limfa düyünlərinin böyüməsini (limfadenopatiya) spesifik simptom kimi aid etmək olar. Düyünlər ağrısız, elastik, hərəkətli və üzərində dəri örtüyü dəyişməmiş qalır. Qeyd edilən simptom yoluxmaya şübhə yaradaraq laborator müayinəyə əsas verir.
Onun dediyinə görə, İİV infeksiyasının diaqnozu klinik, laborator və epidemioloji məlumatlar əsasında Respublika QİÇS-lə Mübarizə Mərkəzinin Ekspert Şurasının qərarı ilə qəbul edilir və təsdiqlənir.
Həmçinin, direktor onu da bildirir ki, İİV-ə yoluxması təsdiq olunan insanlar Mərkəzə müraciət etməlidirlər, onlar burada qeydiyyata alınır və həmin vaxtdan etiotrop antiretrovirus terapiyasına qoşulur.
Həkimin bildirdiyinə görə, İİV infeksiyasına yoluxan şəxslərin bütün həyatları boyu daimi tibbi yardıma ehtiyacları var. İİV/QİÇS zamanı müalicə və yardımın əsas komponentini antiretrovirus terapiyası (ART) təşkil edir. Bu zaman xəstələrin müalicəyə sadiqlik göstərməsi çox vacibdir. Düzgün seçilmiş ART İİV-ə yoluxan şəxslərin həyat keyfiyyətini və müddətini artırır, opportunist infeksiyaların qarşısının alınması üçün immunitetin kəmiyyət və keyfiyyətcə bərpasına dəstək olur. Aparılan müalicə virus yükünü maksimal dərəcədə aşağı salaraq infeksiyanın digər insanlara ötürülmə riskini azaldır və xəstəliyin proqressivləşməsini maksimum uzun müddətə ləngidilir.
Həkim qeyd edir ki, İİV-li xəstələrin müayinə və müalicəsi bütün mərhələlərdə pulsuz və könüllüdür.
Qeyd: Yazı Səhiyyə Nazirliyinə istinadla hazırlanıb.
