Bayraqdar.info – Dövlət İmtahan Mərkəzində (DİM) kimya, biologiya, fizika, tarix, coğrafiya, ingilis dili və rus dili fənlərindən onlayn – “Zoom” platforması üzərindən hazırlıq kursları keçirilib.
Xəbər oktyabrın 19-da bayraqdar.info-ya DİM-dən daxil olub.
“Hazırlıq kurslarında yalnız elektron qeydiyyatdan keçmiş, ixtisası müvafiq fənnə uyğun olan müəllimlər, metodistlər və pedaqoji profilli ali təhsil müəssisələrinin bakalavriat səviyyəsinin müvafiq fənn üzrə təhsil alan sonuncu kurs tələbələri və həmin müəssisələrdə təhsil alan magistrlər iştirak ediblər.
“Öncə şöbə müdiri Afiqə Batıyeva hazırlıq kurslarının proqramı haqqında məlumat verərək qeyd edib ki, kursun nəzəri hissəsi mövcud şəraitə görə 2 gün ərzində onlayn qaydada keçiriləcək. Sonra kursun praktiki hissəsində iştirakçıların ev tapşırıqlarını 15 gün müddətində internet vasitəsi ilə onlara təqdim edilən elektron ünvana göndərməli olduqlarını bildirib. O, hazırlıq kursunun sonunda iştirakçıların kalibrləmə prosesindən keçməli olduqlarını qeyd edib.
“Hazırlıq kurslarında kimya, biologiya, fizika, tarix, coğrafiya, ingilis və rus dili fənni üzrə moderatorlar fənn kurikulumunun strukturu, mahiyyəti, məzmunu haqqında və imtahanlarda mənimsənilmə səviyyəsinin yoxlanılması, qiymətləndirilməsi baarədə məlumatlar veriblər.
“Kursu başa vurmuş müdavimlərin şəxsi məlumatları Mərkəzin elektron “Məlumat bazası”na daxil ediləcək. Onlara DİM-in sertifikatı veriləcək. Gələcəkdə sertifikat almış şəxslər DİM-lə əməkdaşlığa cəlb ediləcəklər.” Məlumatda belə deyilir.
