Bayraqdar.info – Paytaxtın Binəqədi rayonu ərazisində ağacların qanunsuz kəsilməsi ilə bağlı Ekologiya və Təbii Sərvətlər Nazirliyininin məlumatı əsasında Baş Prokurorluğun Cinayət təqibindən kənar icraatlar idarəsində araşdırma aparılıb.
Xəbər bayraqdar.info-ya oktyabrın 15-də Baş Prokurorluqdan daxil olub.
Xəbərdə bildirilir ki, sahibkarlıq fəaliyyəti ilə məşğul olan Qalid Ağalarovun mebel sexində və Balakən rayon sakini Ramiz Seyidovun idarə etdiyi yük avtomobilində “Meşə məhsullarının buraxılış orderi”– meşə bileti olmadan qanunsuz kəsilmiş fıstıq və qoz ağacları aşkar edilib.
Aparılmış araşdırmalarla dövlətin qanunla qorunan mənafelərinə ümumilikdə 39 min manat məbləğində ziyan vurulduğu aşkar edilib.
“Bundan başqa, Zaqatala rayonu Makov kənd sakini Mohuma Qardaşov 2020 və 2021-ci illər ərzində cəmi 3 ədəd “Meşə məhsullarının buraxılış orderi” əsasında meşədən işlik material gətirib. Zaqatala Regional Meşə Təsərrüfatı Mərkəzinin vəzifəli şəxsləri tərəfindən tamah niyyəti ilə rəsmi sənədlərə bilə-bilə yalan məlumatlar daxil edilərək, Mohuma Qardaşovun adına 12 ədəd əlavə order yazılıb. Həmin orderlər əsasında 110 m3-dən çox məhsulunun meşədən çıxarılması müəyyən edilib.
“Faktla bağlı Baş Prokurorluqda Cinayət Məcəlləsinin 259.1-ci (meşələrdə və ya xüsusi mühafizə olunan təbiət ərazilərində ağacların, kolların və ya digər yaşıllıqların, eləcə də, meşə fonduna daxil olmayan ağacların, kolların və ya digər yaşıllıqların qanunsuz kəsilməsi (götürülməsi) xeyli miqdarda ziyan vurduqda), 308.1 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə cinayət işi başlanıb. İstintaq aparılır”, – deyə xəbərdə bildirilir.
