Bayraqdar.info – Xəbər verildiyi kimi bu il aprelin 17-də ölkəmizdə Türkiyənin sənət adamlarının təcrübəsindən bəhrələnmək və yeni istedadlı gənclərin yetişdirilməsi məqsədilə “Sənət Akademiyası”adlı aktyorluq məktəbi təsis edilib. “Sənət Akademiyası” Mədəniyyətin Təbliği və Sosial Təşəbbüslər İctimai Birliyi ilə (MTST) Türkiyənin Eslem Film Yapım Şirkətinin birgə təşəbbüsü ilə yaradılıb.
Ötən müddətdə qarşıya qoyulan hədəflərə çatmaq üçün müvafiq addımlar atılıb. Bu barədə bayraqdar.info-ya açıqlamasında “Sənət Akademiyası”nın direktoru Səbuhi Zaman deyib. Onun sözlərinə görə, iki ölkənin rəhbərlərinin siyasi iradəsi nəticəsində Azərbaycanla Türkiyə arasında bir çox, o cümlədən mədəniyyət sahəsində əlaqələr daha da dərinləşib: “Atılan addımlar İctimai Birlik olaraq illərdir planladığımız mədəniyyət layihəsinin icrasına başlamaq üçün bizi daha da həvəsləndirdi. Beləliklə də, Mədəniyyətin Təbliği və Sosial Təşəbbüslər İctimai Birliyi olaraq təşəbbüs irəli sürdük. Azərbaycanda müxtəlif sənət sahələrində, o cümlədən kino və serial sahəsində bu günə qədər müəyyən irəliləyişlərlə yanaşı bəzi çatışmazlıqların da olduğunu düşünərək, həmçinin Türkiyənin son illər sənətin bir çox sahəsində yüksək inkişaf yolu keçdiyini əsas götürüb birgə əməkdaşlıq haqqında layihə hazırlığına start verdik”.
O da bildirilib ki, Türkiyənin məşhur sənət adamlarının, eyni zamanda kino aktyorlarının səhnə təcrübəsini Azərbaycanın kino sahəsinə maraqlı olan gənclərilə bölüşmək üçün qardaş ölkənin dünyaca məşhur serialı olan “Kurtlar Vadisi Pusu”da əsas rollardan birini oynayan aktyor Erhan Ufak və ona aid olan Eslem Film yapım Şirkətinin heyəti bu il 16-21 aprel tarixlərində Bakıya işgüzar səfərə dəvət edilib.
S.Zaman onu da xatırladıb ki, akademiyanın yarandığı gündən 5 ay keçir: “Bu gün idarə heyəti və tələbələrimizlə birlikdə “Sənət Akademiyası” adlı mədəniyyət layihəsinin daha da irəliyə aparılması üçün var gücümüzlə çalışırıq. Artıq akademiyanın ilk birinci qrupunda aktyorluq dərsləri keçən tələbələrimiz 3 aylıq təlimlərini tamamlayıblar. Beləliklə, ilk məzunlarımız sertifikatlarını almaq üçün oktyabrın 17-də “Bosston restoranında” təşkil ediləcək təqdimat mərasiminə toplaşacaqlar. Sertifikatlar akademiyanın rəhbərləri, müəllimləri və Azərbaycanın tanınmış simaları tərəfindən təqdim ediləcək”.
