Bayraqdar.info – Müdafiə nazirinin tapşırığına əsasən nazirin birinci müavini, Baş Qərargah rəisi, general-leytenant Kərim Vəliyev mühəndis-istehkam qoşunlarının hərbi hissələrində olub.
Xəbər bayraqdar.info-ya oktyabrın 8-də Müdafiə Nazirliyindən daxil olub.
“Bölmələrin döyüş hazırlığını yoxlayan Baş Qərargah rəisinə bildirilib ki, şəxsi heyət mühəndis qoşunlarında müasir mühəndis texnikası və avadanlıqlardan effektiv istifadə etmə bacarıqlarını təkmilləşdirir”, – deyə xəbərdə qeyd edilir.
Daha sonra general-mayor Anar Kərimov mühəndis bölmələrinin fəaliyyəti ilə bağlı məlumat təqdim edib.
O, qeyd edib ki, Prezident, Silahlı Qüvvələrin Ali Baş Komandanı İlham Əliyevin tapşırığına əsasən yeni yaradılan mühəndis taborlarının komplektləşdirilməsi işləri sürətlə davam etdirilir. Qardaş Türkiyədən gələn mütəxəssislər tərəfindən onların hazırlığı yüksək şəkildə həyata keçirilir.
“Azad edilən ərazilərin mühəndis-istehkam bölmələri tərəfindən minalardan və partlamamış döyüş sursatlarından təmizlənməsi işlərinin də davam etdirildiyi diqqətə çatdırılıb. Bildirilib ki, dağlıq ərazilərdə yerləşən bölmələrin mövqeləri istiqamətində yeni yolların çəkilməsi üzrə mühəndis işləri icra edilir.
“Sonra hərbi hissənin təlim poliqonunda mühəndis-istehkamçılar təlim-məşq nümunələri nümayiş etdirib.
“Azad edilən ərazilərdə mühəndis işlərinin daha da sürətli aparılması ilə bağlı müdafiə nazirinin müvafiq tapşırıqları aidiyyəti üzrə vəzifəli şəxslərə çatdırılıb.
“Sonda xidmətdə fərqlənən bir qrup hərbi qulluqçu təltif edilib”, – deyə xəbərdə bildirilir.
