Bayraqdar.info – Nəqliyyat, rabitə və yüksək texnologiyalar naziri Rəşad Nəbiyevin başçılıq etdiyi nümayəndə heyəti beynəlxalq 12-ci Nəqliyyat və Rabitə Şurasında iştirak məqsədilə Türkiyədə səfərdədir.
Məlumat oktyabrın 7-də bayraqdar.info-ya Nəqliyyat, Rabitə və Yüksək Texnologiyalar Nazirliyindən verilib.
“Tədbirin əsas müzakirə mövzusunu COVID-19 pandemiyasından sonrakı dövrdə nəqliyyat və rabitə sistemlərinin inkişafı, rəqəmsallaşmanın genişləndirilməsi təşkil edir.
“Səfər çərçivəsində R.Nəbiyev Türkiyənin nəqliyyat və infrastruktur naziri Adil Karaismailoğlu və sabiq Baş nazir, Ədalət və İnkişaf Partiyasının vitse-prezidenti Binali Yıldırımla görüşüb. Görüş zamanı Bakı-Tbilisi-Qars dəmir yolu xətti layihəsi haqqında fikir mübadiləsi aparılıb.
“Daha sonra R.Nəbiyev 12-ci Nəqliyyat və Rabitə Şurasının “Logistika, Mobillik və Rəqəmsallaşma” mövzusunda Nazirlər Toplantısında iştirak edib.
“Toplantıda qlobal inkişafı dəstəkləmək üçün nəqliyyat və rabitə üzrə sərmayələrin qoyulması, rəqəmsallaşdırma yolu ilə nəqliyyat və logistika sistemlərindən səmərəli istifadə, dayanıqlı nəqliyyat sisteminin qurulması, müvafiq normativ-hüquqi bazanın təkmilləşdirilməsi mövzuları müzakirə predmeti olub”, – deyə məlumatda bildirilir.
Daha sonra nazir R.Nəbiyev çıxışında bildirib ki, 2015-ci ildə Azərbaycan tərəfdaşları ilə birlikdə “Transxəzər Beynəlxalq Nəqliyyat Marşrutu” layihəsi vasitəsilə Şərq-Qərb dəhlizinə yeni həyat bəxş edib: “Dəhliz hazırda Çindən başlayır, Qazaxıstan, Xəzər dənizi, Azərbaycan və Gürcüstandan keçir, Ukrayna, Bolqarıstan və Rumıniyaya qədər uzanır. 2020-ci ildə pandemiya ilə əlaqədar bütün çətinliklərə baxmayaraq Şərq-Qərb dəhlizi ilə 8,4 milyon ton yük daşınıb. Təkcə son bir neçə ildə Azərbaycan nəqliyyat infrastrukturuna milyardlarla dollar sərmayə qoyub. Dünya İqtisadi Forumunun məlumatına görə, bu addımlar sayəsində Azərbaycan hazırda yolların keyfiyyətinə görə dünyada 27-ci, dəmir yolu xidmətlərinin səmərəliliyinə görə 11-ci, hava nəqliyyatı xidmətlərinin səmərəliliyinə görə isə 12-ci yerdədir. 2017-ci ilin oktyabr ayında Trans-Avropa və Trans-Asiya dəmir yolu şəbəkələrini birləşdirən Bakı-Tbilisi-Qars dəmir yolu istifadəyə verilib. İllik 6,5 milyon ton yükdaşıma qabiliyyətinə malik olan dəmir yolu, Çin ilə Cənub-Şərqi Avropa arasında daşınma müddətini 70 faiz azaltmağa imkan verir. Azərbaycan erməni işğalından azad etdiyi Qarabağda kütləvi yenidənqurma işlərinə başlayıb. Nəqliyyat infrastrukturunun bərpası və dəmir yolu dəhlizlərinin yenidən qurulması nəinki Cənubi Qafqazda dəmir yolu şəbəkəsinin inteqrasiyasını genişləndirəcək, həm də Qərbi Çindən Türkiyənin Mersin limanına ən qısa yolu təmin edəcək”.
