Bayraqdar.info – Bugünlərdə Ermənistan xarici işlər naziri Ararat Mirzoyan İrana səfər edib. Səfərin özü bir yana, orda olarkən onun IRNA agentliyinə verdiyi müsahibə diqqətçəkən məqamlarla zəngindir. Təbii ki, ənənəvi erməni yalanları da öz yerində. Lakin işimiz o yalanlarla deyil. Özünü hər zaman Azərbaycanın “müsəlman qardaşı” elan edən İranın rəsmi mövqeyini ifadə edən agentliyin erməni nazirə ünvanladığı suallarladır. Bir daha deyirik, A.Mirzoyanın cavabları bu kontekstdə önəmli deyil.
IRNA-nın suallarından biri belədir: “İranın Güney Qafqaza münasibətdə yanaşması bölgənin etnik və dini deyil, geosiyasi və coğrafi vacibliyinə əsaslanır. Ermənistan İranın bu yanaşmasını necə dəyərləndirir?”
Fikir verdinizmi suala? Daha doğrusu, onun “etnik və dini” kəsiminə? İranın ən öndə gedən və rəsmi Tehranın mövqeyini təkrarlayan agentliyi deyir ki, din məsələsi İran üçün önəmli deyil. Bəs onda “müsəlman qardaşlığı” nağılları necə oldu? İllərdir beynimizi çürüdən “şiə təəssübkeşliyi” harda qaldı? Axı biz həm İrandan, həm də onun buradakı uzantılarından daim eşidirik ki, İran bizim “şiə qardaşımız”dır və bizimlə eyni sıradadır? Hanı? Adam açıq mətnlə deyir ki, dini məsələ əhəmiyyətli deyil!
Təkcə bu sualın qoyuluşu Azərbaycan Respublikasının vətəndaşı olub İrana rəğbət göstərənləri ayıltmalıdır. İran artıq elə bir mərhələyə çatıb ki, dini faktoru belə rədd edərək ermənilərlə əməlli-başlı qardaş olduğunu dilə gətirir. Belə olan halda da kimsə durub “şiə qardaşlığı” nağıllarına inanacaqsa, o adamın zəkasına şübhə edərəm. Yaxud da kimsə hələ də ənənəvi iranpərəstlik edəcəksə, o adamın Vətən sevgisinə və öz dövlətinə – Azərbaycan Respublikasına sədaqətinə şübhə etməkdən başqa çarə yoxdur. Belə adamlara isə yeri, əlbəttə ki, göstərilməlidir, göstəriləcək də.
Ayılmaq vaxtıdır. Özəlliklə də şiə müsəlman qardaşlarımızın ayılmasının vaxtıdır. İranın, dəfələrlə dediyimiz kimi, İslam diniylə, heç şiəliklə də hər hansı əlaqəsi yoxdur. Bu dövlət şiəliyi ən yüksək səviyyədə siyasi istismar vasitəsinə çevirib. Bununla da milyonlarla şiənin ülvi dini hisslərindən sui-istifadə edir. Ona görə də bizim ölkəmizin, elə İranın nəzarətində olan Güney Azərbaycanın şiələri diqqətli olmalı, müsəlmanlara arxa çevirib onun düşmənlərinə qucaq açan İrana layiq olduğu cavabı verməlidir.
Bu arada bu hadisələrin işığında İranın Bakıdakı “dini” nümayəndəliyinin bağlanma xəbəri gəldi. Çoxdan etmək lazım idi bunu. Ermənilərə qucaq açan bir ölkənin “dini” nümayəndəliyinin Azərbaycanda nə işi var? Biz illərdir bunu deyirdik. İllərdir bildirirdik ki, bu nümayəndəlik anti-Azərbaycan mərkəzidir və bağlanmalıdır. Şükürlər olsun ki, oktyabrın 5-də bu məsələ həll edildi. İndi dövlətimiz o nümayəndənin büsbütün Azərbaycanı tərk etməsini də təmin etməlidir. Əgər İslam dini adına nümayəndəlikdən söhbət gedirsə, İslam Xilafəti ayaqda olsaydı onun rəsmi təmsilçiliyini açmaq olardı. Lakin İran kimi zərərli bir ölkənin din adı altında nümayəndəliyinə əsla yol vermək olmaz!
