Bayraqdar.info – Milli Məclisin sədri Sahibə Qafarovanın başçılığı ilə parlament nümayəndə heyəti oktyabrın 7-dən Slovakiyanın paytaxtı Bratislava şəhərində rəsmi səfərdə olacaq.
Bu barədə bayraqdar.info-ya okyabrın 6-da Milli Məclisin Mətbuat və ictimaiyyətlə əlaqələr şöbəsindən məlumat verilib.
Məlumatda bildirilir ki, nümayəndə heyətinin tərkibinə MM-in komitə sədrləri – Sadiq Qurbanov, Musa Quliyev, Zahid Oruc, Slovakiya ilə parlamentlərarası əlaqələr üzrə işçi qrupunun başçısı Anar Məmmədov, deputatlardan Sədaqət Vəliyeva, parlament Aparatının rəhbəri Səfa Mirzəyev və digər rəsmi şəxslər daxildir.
“Səfər çərçivəsində sədrin Slovakiyanın Baş naziri, Milli Şuranın sədri, ölkənin xarici işlər naziri ilə görüşləri nəzərdə tutulub.
“Görüşlərdə ikitərəfli və çoxtərəfli əməkdaşlığın dərinləşməsi, parlamentlərarası əlaqələrin bu günü və gələcək inkişaf istiqamətləri, qanun yaradıcılığında təcrübə və informasiya mübadiləsi və digər məsələlər ətrafında fikir mübadiləsi aparılacaq.
“Səfər müddətində nümayəndə heyətinin üzvləri Slovakiya qanunvericilik orqanının fəaliyyəti ilə maraqlanacaq. Azərbaycanla parlamentlərarası dostluq qrupunun üzvləri ilə görüşdə münasibətlərin dərinləşməsi barədə fikirlərini bölüşəcəklər.
“Səfər oktyabrın 9-da başa çatacaq”, – deyə məlumatda qeyd edilir.
