Son yeniləmə: 23 Sentyabr 2021 19:34
Bayraqdar.info – Rusiyanın Udmurtiya Muxtar Respublikasında fəaliyyət göstərən “Udmurtiya-Azərbaycan Dostluq İctimai Mərkəzi” İdarə heyətinin sədri Zülfüqar Mirzəyev və idarə heyətinin üzvü İlqar Cəbrayılov təşkilatın idarə heyətinin qərarıyla doğma Azərbaycana gəliblər.
Xəbər bayraqdar.info-ya Beynəlxalq Avrasiya Mətbuat Fondundan verilib.
Xəbərdə bildirilir ki, diaspor nümayəndələrinin Vətənə gəlişinin əsas məqsədi İkinci Qarabağ müharibəsinin ildönümü ərəfəsində müharibə zamanı daha çox itkilərə məruz qalan ailələri ziyarət etmək və onlara mümkün dəstək göstərməkdir.
“Udmurtiyada yaşayan 10 minlik Azərbaycan diasporunu təmsil edən Z.Mirzəyev və İ.Cəbrayılov səfər çərçivəsində Diasporla İş üzrə Dövlət Komitəsində olublar. Komitə sədri Fuad Muradovla görüşərək səfərin məqsədi və ölkələr arasında əlaqələrin möhkəmlənməsində diaspor təşkilatlarının rolu barədə müzakirələr aparıblar.
“Növbəti gün nümayəndə heyəti əvvəlcədən planlaşdırıldığı kimi Ağcabədi rayonuna səfər edib və rayon İcra hakimiyyətinin başçısı Rafil Hüseynovla görüşüblər. Görüş zamanı diaspor təmsilçiləri “Udmurtiya-Azərbaycan Dostluq İctimai Mərkəzinin” ətrafında birləşən həmvətənlərin könüllü topladığı vəsait hesabına Ağcabədi rayonunda mənzilə ehtiyacı olan bir nəfər Vətən Müharibəsi şəhidinin ailəsinə fərdi yaşayış evinin tikilməsi barədə təşkilatın idarə heyətinin qərarını rayon rəhbərinin diqqətinə çatdırıblar.
“Bundan sonra Dostluq mərkəzinin sədri Z.Mirzəyev, İdarə heyətinin üzvü İ.Cəbrayılov, Ağcabədi Rayon İcra Hakimiyyətinin Tikinti və memarlıq şöbəsinin müdiri Səfər Səfərov, RİH apatının Vətən Müharibəsi iştirakçıları və şəhid ailələri ilə işin təşkili şöbəsinin müdiri Şöhrət Orucov və RİH başçısının sərəncamı ilə yaradılmış Komissiyanın digər üzvlərinin iştirakı ilə rayonun Nəcəfqulubəyli, Minəxorlu, Hacıbədəlli kəndlərində və Ağcabədi şəhərində 10-a yaxın şəhid ailəsi ilə görüş keçirilib və hər bir ailənin ehtiyacları və mənzil şəraiti öyrənilib. Nəticə olaraq şəhid Atayev Tariyel Fəxrəddin oğlunun ailəsinin ehtiyacları nəzərə alınaraq onun həyat yoldaşı, Ağcabədi rayonunun Minəxorlu kənd sakini Atayeva İlhamə Şakir qızı və iki azyaşlı övladı üçün 0,07 ha həyətyanı torpaq sahəsində müasir tələblərə cavab verən tam təmirli üç otaqlı fərdi yaşayış evinin tikilməsi qərara alınıb. Dərhal da layihə smeta sənədləri hazırlanaraq tikinti işlərinə başlanıb. Hazırda fərdi yaşayış evinin özülü qazılıb, dəmir beton işləri başa çatdırılıb və tikinti işləri sürətlə davam edir.
“Əsgər T.Atayev 5 sentyabr 1986-cı ildə Ağcabədinin Minəxorlu kəndində anadan olub. Vətən Müharibəsində Füzuli, Ağdərə, Xocavənd, Şuşa istiqamətində gedən döyüşlərdə fərqlənib. İgid döyüşçü Şuşa şəhəri uğrunda gedən döyüşlərdə qəhrəmancasına şəhid olub. O, Prezidentin Sərəncamı ilə ölümündən sonra “Vətən uğrunda” medalı ilə təltif edilib. Şəhid Azərbaycanın xalq artisti, mərhum Səfa Qəhrəmanovun bacısı oğludur.
“Qeyd edək ki, “Udmurtiya-Azərbaycan Dostluq İctimai Mərkəzi”nin üzvlərinin səfər çərçivəsində görüşləri, eləcə də şəhid ailələrinə yardımlar və Minəxorlu kənd sakini şəhid T.Atayevin ailəsi üçün üç otaqlı evin tikintisi BAMF-ın prezidenti Umud Mirzəyevin və Fondun könüllülərinin təşkilati dəstəyi ilə həyata keçirilir”, – deyə xəbərdə bildirilir.
