Bayraqdar.info – “Ötən il 44 günlük Vətən müharibəsində əldə etdiyimiz tarixi Zəfər nəticəsində torpaqlarımız işğaldan azad edildi, Azərbaycanın ərazi bütövlüyü bərpa edildi. Müzəffər Ali Baş Komandan İlham Əliyevin rəhbərliyi ilə rəşadətli ordumuzun əldə etdiyi bu qələbə eyni zamanda, digər baxımdan da dünyanın diqqət mərkəzindədir. Belə ki, məhz bu savaşdan sonra dünya birliyi Ermənistanın uzun illər həyata keçirdiyi bəşəri cinayətlərin nəticələri ilə əyani şəkildə tanış ola bildi.”
Bunu bayraqdar.info-ya özəl açıqlamasında Nyu-York Azərbaycan-Amerika Qadın Cəmiyyətinin qurucusu və rəhbəri, Amerika Azərbaycanlıları Koordinasiya Şurası İdarə Heyətinin üzvü Minəvvər Vahabova deyib. Onun sözlərinə görə, bu gün həmin cinayətlər barədə həqiqətlərin dünya birliyinə çatdırılması üçün hər bir azərbaycanlı fəal olmalıdır: “Bu məsələdə bizlərin – xaricdəki diaspor təmsilçilərinin də üzərinə mühüm vəzifə düşür. Elə Diasporla İş üzrə Dövlət Komitəsinin təşkilatçılığı ilə həm ötən ay, həm də bu ay Azərbaycanın diaspor nümayəndələrinin Şuşaya səfərinin təşkil olunmasında da məqsəd həm bizləri işğaldan azad olunan bu tarixi diyara qovuşdurmaq, həm də yeni dövrün tələbləri çərçivəsində fəaliyyət istiqamətlərini müəyyən etmək idi. Təbii ki, Ermənistanın müharibə cinayətləri barədə həqiqətlərin yaşadıqları ölkələrin cəmiyyətinə çatdırılması diaspor təmsilçilərimizin yeni dövrdə əsas vəzifələrindən biri olmalıdır”.
Açıqlamasında avqustun 17-də Şuşaya səfəri barədə təəssüratlarını da bölüşən M.Vahabova bu səfərin onun üçün iki baxımdan xüsusi önəm kəsb etdiyini deyib: “Əvvəla, Şuşa işğaldan azad olunandan bəri bir arzum var idi ki, adını eşitdiyimiz, şəninə nəğmələr qoşulan, mənfur düşmənin gözünə gözəlliyi ilə tikan kimi batan o gözəl şəhəri ziyarət edim. Planlaşdırılmamış halda Azərbaycana gəlməli oldum və təsadüf nəticəsində Diasporla İş üzrə Dövlət Komitəsi həmin ərəfədə Şuşaya gözəl bir səfər təşkil etdi. Beləliklə, möcüzə baş tutdu və mən avqust ayının 17-də dillərə dastan olan, cəsur əsgərlərimizin qanı bahasına azad olunan Şuşada olmaq xoşbəxtliyini yaşadım. Şəhəri qarış-qarış gəzdik, Cıdır düzündə Azərbaycanın və 20-dən artıq ölkənin bayraqları dalğalandı. Mahnılar oxundu, musiqilər səsləndi. Yuxarı Gövhər Ağa məscidində olduq. Əminliklə deyə bilərəm ki, Şuşa təəssüratlarımı hələ uzun müddət bölüşəcəyəm. Bu səfərin mənim üçün ikinci bir önəmi də vardı. Belə ki, qardaşım Nəsib Kaşiyev 1992-ci ildə Şuşada şəhid olub və artıq onun ruhu şaddır”.
Xalqımıza bu şərəfli hissləri yaşadan Ali Baş Komandan İlham Əliyevə, rəşadətli ordumuza minnətdarlıq edən M.Vahabova daha sonra deyib: “Bizim xalqımız Vətən müharibəsi zamanı həmişəkindən daha sıx birləşdi. Xaricdə yaşayan həmvətənlərimiz də bir can, bir ürək oldular. Amerikadakı diaspor təşkilatları da bir gün belə usanmadan Vətənin haqq səsini, həqiqətləri Amerika ictimaiyyətinə, konqresmenlərə, senatorlara, yerli icra nümayəndələrinə, həqiqətləri təkzib edən media nümayəndələrinə çatdırdılar. Vətən müharibəsi günlərində sosial media; Facebook, İnstagram, Twitter səhifələrindən əsl savaşa başlamışdıq. Ali Baş Komandanımızın çıxışlarını səbirsizliklə ğözləyir və baş verənlərə uyğun birlikdə fəaliyyət göstərirdik. Bundan sonra da durmaq yoxdur. Yeni dövrün tələblərinə uyğun olaraq fəaliyyətimizi uğurla davam etdirəcəyik”.
