Bayraqdar.info – “İşğaldan azad edilən ərazilərin Azərbaycanın ümumi enerji sisteminə qoşulması, dayanıqlı və fasiləsiz elektrik enerjisi ilə təchiz edilməsi məqsədi ilə Prezident İlham Əliyevin tapşırığına uyğun olaraq hazırda “Azərenerji” tərəfindən Cəbrayıl, Qubadlı və Zəngilan rayonlarının hər birində 110/35/10 kV-luq yarımstansiyalar tikilir.
Bu xəbəri avqustun 26-da bayraqdar.info-ya “Azərenerji” ASC-nin İctimaiyyətlə əlaqələr mərkəzindən veriblər.
Xəbərdə deyilir ki, “Şükürbəyli” yarımstansiyasından 40 km məsafədə yeni tikilən “Cəbrayıl” yarımstansiyasına, Cəbrayıldan 45 km məsafədə “Qubadlı” yarımstansiyasına, Qubadlıdan 29 km məsafədə isə “Zəngilan” yarımstansiyasına 110 kv-luq ikidövrəli elektrik verilişi xətti çəkilir.
Hər üç yarımstansiyada 110 kv-luq açıq, 35 və 10 kv-luq qapalı paylayıcı qurğular quraşdırılmaqla yeni inzibati bina inşa edilir. Yarımstansiyalar məsafədən idarə olunmaqla Dispetçer İdarəetmə sisteminə qoşulacaq.
ASC-dən bildirilir ki, “Cəbrayıl” yarımstansiyasında artıq işlər tamamlanmaqdadır. “Qubadlı” və “Zəngilan”da da işlərin çox hissəsi görülüb və sürətlə davam etdirilərək yaxın vaxtlarda yekunlaşacaq.
Bundan başqa, hazırda Ağdam rayonunda 110/35/10 kv-luq iki yarımstansiya tikilir.
“Azərenerji” ASC-nin İctimaiyyətlə əlaqələr mərkəzinin rəisi Teymur Abdullayevin verdiyi məlumata görə “Ağdam-1” və “Ağdam-2” yarımstansiyalarının tikintisi sürətlə davam etdirilir və sözügedən yarımstansiyalara “Xındırıstan” yarımstansiyasından 40 km məsafədə ikidövrəli 110 kv-luq yüksək gərginlikli elektrik verilişi xətti çəkilir.
“Qeyd edək ki, bu günə qədər “Azərenerji” tərəfindən Füzulidən Şuşaya 75 km, Daşkəsəndən isə Kəlbəcərə 70 km məsafədə 110 kv-luq ikidövrəli elektrik verilişi xətti çəkilib. 110/35/10 kv-luq “Şuşa” və “Kəlbəcər” yarımstansiyaları tikilərək istismara verilib. Həmçinin, Füzuli şəhərində 110/35/10 kv-luq “Füzuli” yarımstansiyası tikilib və Füzuli rayonundakı “Şükürbəyli” yarımstansiyası genişləndirilərək tam yenidən qurulub”, – deyə “Azərenerji”-nin xəbərində qeyd edilir.
