Bayraqdar.info – Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi” sahibkarlara İnformasiya Texnologiyaları xidmətləri təklif edir.
Bu barədə bayraqdar.info-ya avqustun 25-də Dövlət Agentliyindən məlumat verilib.
Bildirilib ki, Mərkəzin təklif etdiyi xidmətlərin çeşidi genişdir: “Bu xidmətlər arasında son dövrlərdə sahibkarlığın xüsusilə ehtiyacı olan texniki dəstək, şəbəkə təhlükəsizliyi, videomüşahidə və nəzarət sistemləri, informasiya təhlükəsizliyi, İP telefoniya, mobil tətbiq, proqram təminatı, eyni zamanda İT konsaltinq xidmətləri yer almaqdadır”.
O da vurğulanıb ki, “İnnovasiyalar Mərkəzi” 2013-cü ildən Agentliyin strukturuna daxil olan qurumlarda və digər sektorlara aid dövlət və özəl müəssisələrdə səmərəlilik və məhsuldarlığı artırmaq məqsədilə müxtəlif İT həlləri və texniki dəstək xidmətlərini həyata keçirir.
Mərkəz orta və iri şirkətlər üçün vahid məlumat bazası ilə biznes proseslərinin səmərəliliyini artırmağa imkan verən rəqəmsal transformasiya məqsədli məhsul və xidmətləri müəyyənləşdirir. Həmçinin, Mərkəz innovasiya məhsulunun və yüksək texnologiyaların bazar ehtiyaclarına və sahibkarların maraqlarına uyğun hazırlanmasını təmin edir.
Mərkəz və xidmətləri haqqında daha ətraflı məlumatı saytından, Mərkəzin sosial şəbəkələrdəki rəsmi korporativ səhifələrindən əldə etmək mümkündür.
