Bayraqdar.info – Türkiyə Cümhurbaşqanı Recep Tayyip Erdoğan İslam Əməkdaşlıq Təşkilatı (İƏT) Gənclər Forumunun 4-cü Baş Assambleyasına video mesaj göndərib.
Türkiyə mediasının məlumatına görə, mesajında R.T.Erdoğan müsəlmanları ayıq-sayıq olmağa çağırıb: “Müsəlmanlara yaraşan uzaqgörənliklə hərəkət edərək imperialistlərin bizi aldatmaq istədikləri tələlərə düşməməliyik. Bu mübarək mübarizədə hamımızın, xüsusilə də gələcəyimizin qarantı olan müsəlman gənclərimizin üzərinə çox vacib vəzifələr düşür”.
Türkiyənin hər zəmində və hər fürsətdə “Dünya beşdən böyükdür” deyərək qlobal ədalətsizliyə diqqət çəkdiyini vurğulayan R.T.Erdoğan daha sonra bildirib: “Müsəlmanlar artıq öz sülh və rifahı ilə yanaşı bütün bəşəriyyətin təhlükəsizliyi və gələcəyi üçün də məsuliyyəti üzərlərinə götürməli və şahidi olduqları haqsızlıqlar qarşısında daha çox səslərini qaldırmalıdırlar”.
İnsanlıq tarixinin ən təlatümlü dövrlərindən birinə şahidlik edildiyini deyən R.T.Erdoğan, dünya gündəmini davamlı olaraq zəbt edən təhlükəsizlik problemləri, terror fəaliyyətləri və epidemiyaların bütün dünyada tam sabitliyin əldə edilməsinə imkan vermədiyini söyləyib. O, bütün insanlığı təhdid edən bu problemlərin islam coğrafiyasında daha dərin izlər buraxdığını təəssüflə vurğulayıb.
