Bayraqdar.info – Xəbər verdiyimiz kimi, avqustun 23-də Kiyevdə Ukrayna Prezidenti Volodimir Zelenskinin təşəbbüsü və bir sıra dövlətlərin yüksək rütbəli rəsmilərinin iştirakıyla Krım Platformasının təsis toplantısı keçirilib.
Toplantıya Türkiyə adına ölkənin xarici işlər naziri Mevlüt Çavuşoğlu qatılıb.
Toplantının bütün fəaliyyəti sosial media üzərindən canlı yayımlanıb. İştirakçılar Krımın Rusiya tərəfindən işğalı faktına bir daha diqqət çəkərək bu halın sonlandırılmasının vacibliyini qeyd ediblər.
Türkiyəli nazir M.Çavuşoğlu açıq mətnlə bəyan edib ki, onun ölkəsi heç bir halda Krımın ilhaqıyla barışmaq fikrində deyil: “Bu zirvə görüşünə ona görə gəlmişik ki, Ukraynanın ərazi bütövlüyünün və suverenliyinin, Krım tatarlarının hüquqlarının təmin edilməsinin bizim üçün nə qədər önəməli olduğunu nümayiş etdirək. Biz ona görə burdayıq ki, Krımın ilhaqını tanımırıq və heç vaxt da tanıyan deyilik. Bu haqda yalnız danışmaq yetərli deyil. Biz həm də ona görə burdayıq ki, mövqeyimizi bütün başqa tərəflərə də nümayiş etdirək. Və bu mövqeyimizi bütün beynəlxalq platformalarda istisnasız nümayiş etdiririk”.
Əlavə edək ki, toplantının sonunda Krım Platforması adından geniş bir bəyanat qəbul edilib. Bəyanatda Rusiyanın Krımı işğal faktına diqqət çəkilməklə orada insan haqlarının kobud şəkildə pozulması vurğulanır. Eyni zamanda Krımın dinc yolla və ortaq çalışmalarla işğaldan azad edilməsi üçün birgə səylərin vacibliyi qeyd edilir.
#Ukrayna Ziyaretimiz.
Visit to #Ukraine. 🇹🇷🇺🇦 pic.twitter.com/H346aUQFRp— Mevlüt Çavuşoğlu (@MevlutCavusoglu) August 23, 2021
