Bayraqdar.info – Azərbaycanın Meksikadakı səfiri Məmməd Talıbov Peruya səfəri zamanı ölkənin nüfuzlu “Expreso” qəzetinə müsahibə verib. Bu barədə bayraqdar.info-ya avqustun 24-də ölkəmizin Meksikadakı səfirliyindən məlumat verilib.
Müsahibə zamanı səfir öncə Perunun yeni seçilmiş Prezidenti Pedro Kastiyonun ölkədə akkreditə olunmuş diplomatik korpusla görüşündə iştirak etmək üçün paytaxt Lima şəhərinə səfəri haqda məlumat verib. M.Talıbov seçkilərdəki qələbə və Perunun müstəqilliyinin 200 illik yubileyilə bağlı bu ölkənin dövlət başçısı və xalqına Azərbaycan Prezidenti İlham Əliyevin təbriklərini çatdırıb. Azərbaycanın Peru ilə bütün sahələrdə əlaqələrini daha da genişləndirməkdə maraqlı olduğuu bildirib.
Bildirilib ki, diplomatik korpusla görüş çərçivəsində Peru Prezidenti ilə keçirilmiş qısa söhbət zamanı dövlət başçısı da öz ölkəsi ilə Azərbaycan arasında münasibətlərin önəmini qeyd edib. Həmçinin, Azərbaycan və Peru arasındakı əlaqələrdən bəhs edilərək, ölkələrimiz arasında həm ikitərəfli həm də beynəlxalq təşkilatlar çərçivəsində əməkdaşlıq barədə məlumat verilib. Bu xüsusda BMT və Qoşulmama Hərəkatı çərçivəsində səmərəli əməkdaşlıq əlaqələrinin mövcudluğu qeyd edilib. Ermənistan və Azərbaycan arasında mövcud olmuş münaqişə ilə bağlı Perunun hər zaman beynəlxalq hüququ, Azərbaycanın suverenliyi və ərazi bütövlüyünü dəstəklədiyi və bunun ölkəmiz üçün mühüm əhəmiyyət kəsb etdiyi vurğulanıb.
Eyni zamanda, parlamentlərarası əlaqələr sahəsində fəallıq diqqətə çatdırılıb. Enerji sektoru, nəqliyyat, ticarət, elm, təhsil, gənclər və sair qarşılıqlı maraq doğuran istiqamətlərdə birgə fəaliyyətin davam etdirilməsi üçün gözləntilərin olduğu bildirilib.
Müsahibə zamanı Ermənistan və Azərbaycan arasında mövcud olmuş münaqişə haqda və 44 gün davam etmiş Vətən müharibəsinin nəticələri haqda məlumat verilib. Regionda sülhün möhkəmləndirilməsi üçün tərəflərin qarşılıqlı olaraq beynəlxalq hüquqa, biri-birinin suverenliyi və ərazi bütövlüyünə hörmətlə yanaşmasının vacibliyi vurğulanıb. Azərbaycan Prezidenti tərəfindən ölkəmizin Ermənistanla sülh haqqında müqavilə imzalamağa hazır olması barədə bəyanatına baxmayaraq, qonşu ölkənin təxribatçı addımları barədə söz açılıb, “revanşist” və təcavüzkar ritorikanın davam etdirməsinin təəssüf doğurduğu, sülh və təhlükəsizliyə mane olduğu bildirilib.
Səfir, həmçinin ölkə rəhbərliyi tərəfindən aparılan uzaqgörən siyasət nəticəsində ölkəmizin müstəqillik dövründə nail olduğu iqtisadi inkişaf barədə danışıb. Müsahibədə Azərbaycan tarixindən məlumat verilərək ölkəmizin Şərqdə ilk demokratik respublika olması, habelə dünya ölkələri arasında qadınlara səsvermə hüququ vermiş ilk ölkələrdən biri olduğu bildirilib.
Daha sonra Azərbaycanın COVİD-19 pandemiyasına qarşı aparılan beynəlxalq mübarizəyə verdiyi töhfədən söz açılıb, Qoşulmama Hərəkatının sədri qismində bu mövzuda Azərbaycan Prezidentinin təşəbbüsü barədə danışılıb.
