Bayraqdar.info – Avqustun 23-də Müdafiə və Daxili İşlər nazirliklərinin dəstəyi və “Fire Land Production”ın təşkilatçılığı ilə Vətən müharibəsində şəhid olmuş qəhrəmanların övladları üçün “Mənim atam qəhrəmandır” layihəsinin növbəti tədbiri keçirilib.
Müdafiə Nazirliyindən bayraqdar.info-ya verilən xəbərdə bildirilir ki, tədbir Dağüstü parkda təşkil edilib. Tədbirin məqsədi Vətən torpaqları uğrunda canından keçən qəhrəmanları bir daha anmaq, onların övladlarına daim xalqın diqqət mərkəzində olduqlarını hiss etdirmək, şəhid balalarının səmərəli istirahətini təşkil etmək olub.
“Olimpiya çempionlarının da dəvət olunduğu tədbir Müdafiə Nazirliyinin Təlim Tədris Mərkəzindən başlayıb. Ekskursiya avtobuslarında şəhəri gəzən şəhidlərin övladları “Zəfər marşı”nı ifa edərək tədbirə qatılıblar. Onlar öz atalarının fotoları həkk edilən geyimlərdə, digər uşaqlar üzərində subay şəhidlərin rəsmləri, şəhid anaları isə övladlarının şəkli olan və “Mənim qəhrəmanım” yazılmış geyimlərdə tədbirə qatılıblar.
“Şəhidlərin xatirələri bir dəqiqəlik sükutla yad edilib. Sonra Nazirliyin Sosial Müdafiə Şöbəsinin rəisi Həbib Məmmədov bu cür tədbirlərin mütəmadi keçirilməsinin təqdirəlayiq hal olduğunu bildirib. Vətən uğrunda canından keçmiş oğulların övladlarının hər birimiz üçün bir əmanət olduğunu deyən şöbə rəisi onların işıqlı gələcəyi naminə əlimizdən gələn hər şeyi etməyin vacibliyini vurğulayıb.
“DİN-in Mətbuat xidmətinin rəis müavini, polis polkovnik-leytenant Hafiz Təmirov da şəhid və qazilərin qəhrəmanlıqlarının xalq tərəfindən heç vaxt unudulmayacağını, bu cür oğulların var olduqca bu Vətənin daim yaşayacağını deyib.
“Bakı Şəhər Gənclər və İdman Baş İdarəsinin rəisi Raqif Abbasov da kimliyindən asılı olmayaraq hər kəsin şəhid ailələrinə diqqətlə yanaşmasının vacibliyindən danışıb.
““Fire Land Production”un rəhbəri Cəlal Qurbanov öz növbəsində tədbirin əsas məqsədinin qanı ilə tarix yazan hər bir şəhidin uşaqdan böyüyə hər kəsin yaddaşına həkk olunması, daim qürurla xatırlanması olduğunu deyib. Dövlət başçısı, Ali Baş Komandan cənab İlham Əliyevin böyük həssaslıq və sevgiylə yanaşdığı şəhid ailələrinin hamımızın əzizi, doğması olduğunu bildirən C.Qurbanov vurğulayıb ki, xalq da hər zaman qəhrəmanların ailələrinin yanındadır. O, bu layihənin hüdudlarının təkcə Bakı şəhərini əhatə etməyəcəyini, Azərbaycanın digər bölgələrində də bu cür tədbirlərin keçiriləcəyini deyib”, – deyə xəbərdə bildirilir.
Xəbərdə qeyd edilir ki, tədbirdə daha sonra şəhid analarına müraciətlə çıxış edən ilahiyyatçı Hacı Zaur Məmmədov onlara belə qəhrəman övladlar yetişdirdiklərinə görə minnətdarlığını bildirib, şəhidlərə rəhmət diləyib.
Əməkdar artist Sevda Ələkbərzadə “Sən yadıma düşəndə” mahnısını ifa edib.
Sonra “Əbədi məşəl” abidə-kompleksində qəhrəmanların övladları “Zəfər” marşını oxuyaraq və səmaya ağ göyərçinlər uçuraraq dünyaya “Müharibə olmasın! Uşaqlar atasız qalmasın!” mesajını veriblər.
Sonda qəhrəman övladlarına “Xarıbülbül” döş nişanı hədiyyə olunub.
