Bayraqdar.info – Avqustun 24-də Ukrayna dövlət müstəqilliyinin 30 illiyini qeyd edir. Xəbər verdiyimiz kimi, Azərbaycan Prezidenti İlham Əliyev avqustun 23-də bu münasibətlə Ukrayna Prezidenti Volodimir Zelenskiyə təbrik məktubu ünvanlayıb.
Avqustun 24-də isə ABŞ Dövlət katibi Entoni Blinkenin də bənzər məktubu yayımlanıb.
ABŞ Dövlət Departamentindən bayraqdar.info-ya daxil olan məlumata görə, E.Blinken Ukraynanın müstəqilliyinin 30 illiyi ilə bağlı açıqlamasında qeyd edib ki, öz ölkəsi adından bu ölkənin xalqına ən xoş arzularını çatdırır.
Ukraynanın 30 il öncə müstəqillik yönündə atdığı addımları və gələcəyə hesablanan planlarını da xatırladan E.Blinken hazırda bu ölkənin tutduğu yönə və qarşılaşdığı təcavüzə də diqqət çəkib.
ABŞ Dövlət katibi Ukraynanın AvroAtlantik məkana inteqrasiya təşəbbüslərini təqdir etməklə bərabər qeyd edib ki, onun ölkəsi bu yeni ölkənin ərazi bütövlüyünün bərpasının tərəfdarıdır. E.Blinken əlavə edib ki, “biz Ukraynanı Rusiya təcavüzündən müdafiə məsələsində dəstəkləməyə davam edəcəyik”.
Dövlət katibi əlavə edib ki, Ukraynanın öz arzularına çatması üçün demokratikləşmə, korrupsiyaya qarşı mübarizə istiqamətində tədbirlər davam etdirilməlidir.
