Son yeniləmə: 23 Avqust 2021 18:06
Bayraqdar.info – Təhsil Nazirliyinin dəstəyi, 2 nömrəli Uşaq-Gənclər İnkişaf Mərkəzinin təşkilatçılığı ilə 20 avqust – 6 noyabr 2021-ci il tarixlərini əhatə edən “Tarixi qələbə” adlı onlayn respublika rəsm müsabiqəsi başlayıb.
Təhsil Nazirliyindən bayraqdar.info-ya verilən xəbərdə bildirilir ki, təhsil sistemində fəaliyyət göstərən uşaq-gənclər inkişaf mərkəzlərinin dərnək üzvləri arasında keçirilən müsabiqənin məqsədi vətənpərvərlik hisslərini aşılamaqdır. Həmçinin, istedadlı uşaqların bilik və bacarıqlarını inkişaf etdirmək, asudə vaxtını səmərəli təşkil etmək də bu müsabiqənin məqsədlərindən biridir.
“Müsabiqə 3 yaş qrupunda (6-9 yaş, 10-13 yaş, 14-18 yaş) olmaqla 2 mərhələdə keçirilir:
“I mərhələ – 20 avqust – 20 oktyabr 2021-ci il tarixlərini əhatə edir. Bu mərhələdə hər yaş qrupu üzrə seçilmiş namizəd 1 ədəd rəsm işini 2 nömrəli Uşaq-Gənclər İnkişaf Mərkəzinin e-poçt ünvanına göndərməlidir;
“II mərhələ – 21 oktyabr – 6 noyabr 2021- ci il tarixlərini əhatə edir. Bu mərhələnin qalibləri münsiflər heyəti tərəfindən müəyyən edilir.
“Müsabiqə üzrə şərtlər aşağıdakılardır:
– Rəsmlər A3 və ya A4 formatda işlənməlidir;
– İşlənmə texnikası sərbəstdir;
– Rəsmlərin aşağı sağ küncündə rəsmin adı, dərnək üzvünün adı, soyadı, yaşı və mərkəzin adı qeyd olunmuş etiket vurulmalıdır.
Müsabiqənin qalibləri və fəal iştirakçıları Mərkəzin diplom və sertifikatları ilə təltif olunacaq”, -deyə Nazirliyin xəbərində qeyd edilir.
