Kiyevdə beynəlxalq səviyyəli Krım Platforması təsis edilir

Bayraqdar.info – Avqustun 23-də Kiyevdə Ukrayna Prezidenti Volodimir Zelenskinin təşəbbüsüylə qurulacaq Krım Platforması öz işinə başlayır.

Platforma bu toplantıyla rəsmən təsis edilmiş olacaq. Müxtəlif dövlətlərin rəhbərlərinin və yüksək vəzifəli rəsmilərinin də qatılacağı Platformanın işi “Krım Ukraynadır” şüarı altında keçiriləcək.

Qurumun təşkilatçılarının açıqladığı xəbərə görə, qeyd olunan şüar altında keçiriləcək toplantının məqsədi dünya ictimai rəyinin Krım məsələsi ətrafında birliyini göstərməkdir. Eyni zamanda Krım ətrafında Rusiyanın cinayət əməllərini ictimailəşdirmək, ərazini işğaldan azad etmək üçün beynəlxalq siyasətin yönlərini müəyyənləşdirmək Platformanın hədəfləri arasındadır.

Qeyd olunur ki, toplantı rəsmi şəkildə Krım Platformasının təməlini qoyacaq. Bu Platforma Ukrayna Xarici İşlər Nazirliyi yanında yeni bir beynəlxalq məsləhətləşmə və koordinasiya formatı kimi fəaliyyət göstərəcək.

Platformanın təsis toplantısının sonunda Krımla bağlı beynəlxalq sənəd – ortaq bəyannamənin qəbulu nəzərdə tutulur.

Platformanın təsis toplantısı sosial media üzərindən də canlı yayımlanacaq.