Son yeniləmə: 18 Avqust 2021 13:16
Bayraqdar.info – Bakı Şəhər Təcili və Təxirəsalınmaz Tibbi Yardım Stansiyasının həkimi Aygün İsmizadənin sayıqlığı nəticəsində bir nəfər ölümdən xilas edilib.
Səhiyyə Nairliyindən avqustun 18-də bayraqdar.info-ya verilən məlumata görə, hadisə Xaçmaz rayonunda baş verib.
İstirahət mərkəzində bir nəfər dənizdə olduğu zaman ürək tutması ilə huşsuz vəziyyətə düşüb və yaxında olan vətəndaşların yardımı nəticəsində sahilə çıxarılıb.
“Orada istirahətdə olan həkim Aygün İsmizadə dərhal həmin şəxsə ilkin yardım olaraq ürək masajı etməyə başlayıb. 107 kq çəkidə olan vətəndaşı 25 dəqiqə davam edən ürək masajından sonra həyata qaytarmaq mümkün olub”, – deyə Nazirliyin məlumatında bildirilir.
“Aygün İsmizadə deyib: “Artıq peşə vərdişidir. Hər zaman və hər yerdə hadisələrə dərhal müdaxilə etməyi özümüzə borc bilirik. Oğlum dənizdə bir nəfər adamın öldüyünü dediyi anda sahilə qaçdım. Vətəndaşın ürək dayanmasından huşsuz vəziyyətdə olduğunu gördüm və dərhal ürək masajı etməyə başladım. Çox sevinirəm ki, yardımım nəticəsində həmin adamın həyatını xilas etmək mümkün oldu. Səhiyyə Nazirliyinin həkimi olaraq vətəndaşlarımıza hər zaman xidmət etməyə hazırıq.
“Səhiyyə Nazirliyi göstərdiyi ilkin tibbi yardım nəticəsində vətəndaşımızı yenidən həyata qaytaran qəhrəman həkimə təşəkkür bildirib”, – deyə Nazirliyin xəbərində qeyd edilib.
