Bayraqdar.info – Trend Xəbər Agentliyinin verdiyi xəbərə görə, Bakı Ağır Cinayətlər Məhkəməsində Binəqədi Bələdiyyəsinin sədri Niyaz Niftiyev, onun müavini olmuş Mətanət Nəsibova və Bələdiyyə vergiləri və yerli gəlirlər şöbəsinin müdiri Sahib Abışovun cinayət işi üzrə məhkəmə iclası davam etdirilib.
Trend-in məlumatına görə, hakim Əli Məmmədovun sədrliyi ilə keçirilən prosesdə prokuror çıxış edib. Dövlət ittihamçısı Niyaz Niftiyev və Sahib Abışov barəsində 2 il 6 ay müddətinə, Mətanət Nəsibovanın isə 2 il müddətinə sınaq müddəti seçilməklə şərti cəza verilməsini istəyib.
Daha sonra məhkəmə hökm elan edib.
Məhkəmənin hökmü ilə, Niyaz Niftiyevə 8 ay 1 gün şərti cəza verilib və o məhkəmə zalından azadlığa buraxılıb.
Binəqədi rayon Prokurorluğunun məlumatına görə, Binəqədi qəsəbə bələdiyyəsinin Bələdiyyə vergiləri və yerli gəlirlər şöbəsinin müdiri Abışov Sahib Abdulla oğlunun qanusuz hərəkətləri ilə əlaqədar Cinayət Məcəlləsinin müvafiq maddələri ilə başlanmış cinayət işi üzrə Korrupsiyaya qarşı Mübarizə Baş İdarəsində aparılan istintaq zamanı Sahib Abışovun ayrı-ayrı vaxtlarda həmin bələdiyyənin sədri və sədr müavini vəzifələrində işləmiş Niftiyev Niyaz Məmmədəli oğlu və Nəsibova Mətanət Hüseyn qızı ilə qabaqcadan əlbir olub ümumilikdə 51 nəfər şəxsdən müxtəlif məbləğlərdə rüşvət alınması müqabilində onların ölkə ərazisində tətbiq edilmiş karantin dövründə qanunsuz olaraq sərbəst hərəkət etmələri üçün saxta arayışların verilməsinə əsaslı şübhələr müəyyən edilib.
Xatırladaq ki, N.Niftiyev uzun müddət jurnalist fəaliyyəti ilə məşğul olub. O, Mətbuat Şurası İdarə Heyətinin üzvüdür. Azadinform.az saytının rəhbəri idi.
Bayraqdar.info: İlk gündən media cameəsi N.Niftiyevə qarşı irəli sürülən ittihamın əsassız olduğuna inanıb. Ona görə də jurnalistlər, ictimai fəallar bu ötən müddət ərzində onun haqsız yerə həbsdə saxlanılmasına etiraz edib. Bugünlərdə isə 250 nəfərdən artıq jurnalist, deputat, ictimai-siyasi xadim N.Niftiyevə haqsızlıq edilməsilə bağlı müraciətlə çıxış edib. Milyonları mənimsəyənlərin əl-qol sallayaraq cəmiyyət içində rahat gəzdiyi bir ölkədə N.Niftiyev kimi müsbət imici və təmiz adı olan birisini haqsız yerə düz 16 ay həbsdə saxlayanlar (və saxladanlar), hər halda günün birində bunun izahatını mütləq verməli olacaqlar.
