Bayraqdar.info – Yerli ali təhsil müəssisələri üçün Təhsil Nazirliyinin və AMEA-nın təşkilatçılığı ilə “Horizon Europe” elmi-tədqiqatlar qrant proqramı barədə onlayn təlim təşkil olunub.
Xəbər bayraqdar.info-ya avqustun 2-də Təhsil Nazirliyindən verilib.
Xəbərdə deyilir ki, beş təqdimatı ehtiva edən təlimin məqsədi elmi-tədqiqat qrant layihələrinə müraciət, mövcud imkanlar, Marie Skłodowska-Curie Actions (MSCA), COST və tibb üzrə işçi proqramları barədə yerli ATM-lər haqqında məlumat verməkdir.
“Həmçinin, təlimlərdə alimlər üçün lazımi informasiyanı təmin etmək və iştirakçılar arasında bu sahədə məlumat mübadiləsi və əməkdaşlığı təşviq etmək layihənin məqsədlərindəndir”, – deyə xəbərdə bildirilir.
Təlimdə 20-dən çox ali təhsil müəssisəsindən 60-a yaxın nümayəndə iştirak edib. Sonda görüş iştirakçılarını maraqlandıran suallar cavablandırılıb.
