Bayraqdar.info – İyulun 30-da səhər saat 09:18 radələrində metronun 28 May stansiyasından Nizami stansiyasına doğru hərəkət edən, Dərnəgül stansiyası istiqamətli qatar təxminən 7 dəqiqəyə yaxın dayanmalı olub. Bir müddət sonra hərəkətə keçən qatar yenidən dayanıb və metronun hərəkəti 09:25-də bərpa olunub. Lakin 09:31-də qatarın daha hərəkət etməyəcəyi bildirilib, sərnişinlərin vaqonları tərk etməsi xahiş olunub.
Sonradan metrostansiyalarda işıqların söndüyü də məlum olub.
Hadisə şahidlərinin bildirdiyinə görə, metroda bu hadisə sonucu izdiham yaşanıb.
Məsələ ilə bağlı Bakı Metrosunun mətbuat katibi Bəxtiyar Məmmədov bildirib ki, problemlə bağlı araşdırma aparılır.
“Buna səbəb həmin xətdə gərginliyin itməsidir. Son nəticədə “Cəfər Cabbarlı” və “Şah İsmayıl Xətai” stansiyaları arasında da qatarların hərəkəti çətinləşib və bir qatar tuneldə qalıb.
“Nizami-İnşaatçılar” sahəsində metropolitenə gələn xətlərdə elektrik enerjisinin verilməsində qısa müddətli gərginlik düşməsi nəticəsində xətlər üzrə qatarların hərəkətində yubanmalar müşahidə olunur”, – deyə o qeyd edib.
