Bayraqdar.info – İyulun 29-da “44 günlük Vətən müharibəsi və müharibədən sonra Azərbaycanın xarici siyasəti” mövzusunda diplomatiya həftəsinin bağlanış mərasimi keçirilib.
Bu barədə bayraqdar.info-ya XİN-dən məlumat verilib.
Azərbaycanda fəaliyyət göstərən 15 könüllü təşkilat və hərəkat nümayəndələrinin iştirakı ilə keçirilən diplomatiya həftəsi XİN və ADA Universitetinin birgə təşkilatçılığı ilə baş tutub.
Bağlanış mərasimində xarici işlər naziri Ceyhun Bayramov və ADA Universitetinin rektoru Hafiz Paşayev iştirak edib.
Öncə Azərbaycanın ərazi bütövlüyü uğrunda canlarından keçən Şəhidlərin xatirəsi bir dəqiqəlik sükutla yad olunub.
Sonra layihədə iştirak edən könüllülərin fəaliyyətini əks etdirən “Azərbaycan könüllülərinin bir günü” videosu təqdim edilib.
Tədbirdə, həmçinin diplomatiya həftəsi çərçivəsində həyata keçirilən görüş və fəaliyyətlər barədə yekun hesabat videosu nümayiş etdirilib.
Tədbirdə çıxış edən xarici işlər naziri C.Bayramov Azərbaycan Respublikasının Prezidenti, Ali Baş Komandan İlham Əliyevin başçılığı altında Şanlı Azərbaycan Ordusunun qazandığı tarixi Zəfərin yüksək əhəmiyyətindən bəhs edib.
Nazir diplomatiya həftəsinin hər bir azərbaycanlı üçün rəmzi məna daşıyan Zəfərimizə həsr olunmasının vacibliyi haqqında danışıb. C.Bayramov həftə ərzində müxtəlif sahələr üzrə keçirilmiş görüşlərin əhəmiyyətini qeyd edib və sözügedən görüşlərdə iştirak edən yüksək səviyyəli nümayəndələrə təşəkkür edib.
Nazir eyni zamanda, könüllülük hərəkatı çərçivəsində Azərbaycan gənclərinin dövlətimizə, cəmiyyətimizə verdiyi töhfədən geniş danışıb. Könüllülüyün təkcə bir hərəkat deyil, həmçinin, Azərbaycan xalqı üçün bir ənənə və həyat tərzi mahiyyəti kəsb etdiyi bildirilib.
C.Bayramov diplomatiya həftəsinin Azərbaycanda fəaliyyət göstərən 15 könüllü təşkilatının könüllülərini əhatə etməsini yüksək qiymətləndirərək, gənclərə gələcək fəaliyyətlərində uğurlar arzu edib.
Daha sonra iştirakçılara sertifikatların təqdim olunması mərasimi keçirilib və diplomatiya həftəsinin 40-a yaxın iştirakçısı sertifikatla təltif olunub.
Diplomatiya həftəsinin yekunlaşması ilə əlaqədar, tədbirə ev sahibliyi edən ADA Universitetinin rektoru Hafiz Paşayev, bütün iştirakçıları təbrik edib və gənclərə öz dəyərli tövsiyələrini verib.
Rektor, hər bir Azərbaycan vətəndaşı üçün tariximizin bu qürurverici səhifəsinin vacibliyi və əhəmiyyətindən ətraflı danışıb.
H.Paşayev, həmçinin təhsil aldığı sahədən asılı olmayaraq hər bir Azərbaycan gəncinin tariximizi yaxşı öyrənməli və bilməli olduğununun vacibliyini vurğulayıb.
Rektor, diplomatiya həftəsinin yekunlaşması ilə əlaqədar olaraq iştirakçıları təbrik edib və gələcəkdə seçdikləri sahənin peşəkarı olmalarını tövsiyə edib.
