İyulun 22-də ölkə Prezidenti İlham Əliyevin ölkənin qərbinə səfəri zamanı Az.TV-yə verdiyi geniş müsahibə ilk andan ciddi müzakirə olunmağa başladı. Hətta siyasətdən uzaq adamlar da müsahibənin hər cümləsinə diqqət kəsildi, Prezidentin verdiyi cavablarla bir sıra məsələləri özləri üçün aydınlaşdırdı.
Nə gizlədim, bəzən cəmiyyət içində bizim də müəyyən məsələlərlə bağlı izahat verməyimiz çətin olur. Ölkə başçısının siyasətini ardıcıl izləyən, gərək olduğunda şərh edən, ictimai rəyə çatdıran yazılarımız, çıxışlarımız az olmayıb. Bəzən qarşımıza elə suallar çıxıb ki, onlara cavab verməkdə sıxıntımız olub. Çünki yetərincə bilgiyə sahib olmadığımız üçün cavab verməkdə obyektiv səbəblərdən çətinlik çəkmişik.
Prezidentin sözügedən müsahibəsi bizim məhz cavab verməyə – izah etməyə çətinlik çəkdiyimiz məsələlərlə bağlı bütün suallara aydınlıq gətirdi. Bəli, məhz bütün. Heç bir qaranlıq məsələ qalmadı. Yaxud da İ.Əliyev heç bir sualdan yayınmadı, heç nəyə də səthi toxunmadı. Əksinə, daha geniş, hər kəsin yaxşı anlaya biləcəyi şəkildə cavablandırdı sualları.
Bizi və əminik ki, hər kəsi daha çox maraqlandıran, təbii ki, Qarabağla bağlı suallardır. Prezident bununla bağlı məsələyə o qədər açıq şəkildə aydınlıq gətirdi ki, artıq əlavə suala ehiyac da qalmadı.
Ölkə başçısı Qarabağdan danışanda açıq şəkildə bildirdi ki, Xankəndi də daxil olmaqla bütün əraziyə məhz Azərbaycan nəzarət edir. Yəni kimlərsə düşünməsin ki, Rusiya sülhməramlıları olan torpaqlarımız Azərbaycanın nəzarətindən kənardadır.
Prezident onu da qeyd etdi ki, Laçın dəhlizi də tam şəkildə Azərbaycanın müşahidəsi altındadır. Oradan kim keçir, kim gəlib-gedir, hamısından Azərbaycanın xəbəri var.
Yeri gəlmişkən, ölkə başçısı maraqlı bir ifadə də işlətdi: hər şey ayağımızın altındadır. Yəni Azərbaycan Şuşada oturub istər Xankəndi, istərsə də Laçını sözün həqiqi mənasında ayağının altına alıb. Hətta elə bir şəkildə ki, Xankəndinin küçələrində gəzişən adamlar belə Azərbaycanın müvafiq xidmətlərinin nəzarətindədir.
Müsahibədən bəlli oldu ki, hazırda Qarabağda aşağı-yuxarı 25 min erməni qalıb. Təbii ki, bu bir ovuc erməniyə də hansısa status verilməsindən söhbət gedə bilməz. Prezident bu məsələyə də özünəməxsus aydınlıq gətirdi: mən statusun hara getdiyini artıq demişəm.
Xatırlatma: 44 günlük Vətən savaşının dərhal ardından Prezident İlham Əliyev demişdi ki, “Qarabağın statusu cəhənnəmə getdi, gora getdi, gorbagor oldu”.
Maraqlı məqamlardan biri də odur ki, Prezident iyulun 20-də Rusiyaya etdiyi səfər çərçivəsində bu ölkənin rəhbəri Vladimir Putinlə uzun çəkən ikili söhbəti zamanı hər hansı anlaşılmazlığın olmadığını ayrıca vurğuladı. Bu isə o deməkdir ki, Rusiya Prezidenti Azərbaycanın Qarabağla bağlı birmənalı mövqeyinə hər hansı şəkildə etiraz etmir, əksinə, ölkəmizi dəstəkləyir.
Ortada belə bir durumun olması Ermənistana və Qarabağda qalan ermənilərə ismarıcdır. Yəni onlar ağıllarını başlarına toplayıb Prezident İlham Əliyevin sülh çağırışlarına mümkün qədər tez cavab versələr özlərini də, bizi də gərəksiz müzakirə və mübahisələrdən xilas etmiş olarlar. Yaxud da Prezidentin sözüylə desək, Ermənistanın inkişafı bu sülhdən keçir. Nə qədər tez sülhə gəlsələr, o ölkə o qədər tez inkişaf etməyə başlayacaq…
Bu arada əlavə edək ki, Ermənistanın fəaliyyətdə olan Baş naziri Nikol Paşinyan da iyulun 22-də nəhayət ki, Azərbaycanla sülh bağlamaq zərurətini dilə gətirib…
Eyni gündə mediada yayımlanan başqa bir maraqlı xəbər isə Kəlbəcərdə yerləşən qədim alban məbədi Xudavəngin ermənilərin üzünə qapadılmasıdır. Ermənistan mediasının yaydığı xəbəri tirajlayan Azərbaycan mediası bildirir ki, bu ilin may ayından ermənilərin məbədi ziyarət etməsi dayandırılıb. Hətta erməni keşişlər də artıq orada deyillər…
Yeri gəlmişkən, biz də bir müddət öncə belə ziyarətlərin yasaqlanması üçün çağırış etmişdik. Çünki Azərbaycan ərazisindəki alban dini məbədini ermənilər nə adla və hansı haqla ziyarət etməlidir?..
Əlavə edək ki, Prezindentin Qarabağla bağlı suala cavabının bir hissəsini şəxsi TikTok səhifəmizdə paylaşdıq. Qısa müddətə minlərlə insanın baxdığı videoya yazılan şərhlər isə bir daha təsdiq edir ki, insanlarımız Prezidentin bu siyasətini ürəkdən bəyənir. Qeyd edək ki, TikTok hesabımız hələ yenidir və yetərincə populyar deyil…
@azerhasretPrezident aydınlıq gətirdi. Qarabağ. ##ilhaməliyev ##qarabağ ##laçın ##xankəndi ##şuşa ##kəşfet ##azərhəsrət♬ Originalton – Azer Hasret
