Bayraqdar.info – İyulun sonu, avqustun əvvəllərində günəbaxan sahələrində məhsul yığımına başlanılacaq.
Kənd Təsərrüfatı Nazirliyindən bayraqdar.info-ya iyulun 16-da verilən xəbərə görə, bu münasibətlə kənd təsərrüfatı naziri İnam Kərimov yığım ərəfəsində günəbaxan əkini ilə məşğul olan fermerlərlə görüşüb.
Samux rayonunun Alıuşağı kəndində keçirilən görüşdə məhsul yığımına hazırlıq, yığılmış məhsulun satışı, günəbaxan toxumçuluğu, sahələrdə bitki mühafizə tədbirləri, suvarma məsələləri və digər mövzular ətrafında fikir mübadiləsi aparılıb. Qeyd olunub ki, bu il Azərbaycanda 11 min hektara yaxın sahədə günəbaxan əkilib. Ötən il sahələrdən orta hesabla 22,4 sentner məhsul yığılıb. Düzgün aqrotexniki tədbirlərin aparılması nəticəsində bu il orta məhsuldarlığın daha yüksək olacağı gözlənilir.
Günəbaxan əkinlərinin əsas hissəsi Gəncə-Qazax iqtisadi rayonunun payına düşür. Bu il Samux rayonunda 1 min 791 hektar sahədə günəbaxan əkilib, avqustun ilk günlərindən samuxlu fermerlər məhsul yığımına başlayacaqlar.
Xəbərdə qeyd edilir k, fermerlərin qaldırdığı məsələlər və səsləndirdikləri təkliflər qeydə alınıb, müraciətlərin icrası üçün tapşırıqlar verilib.
Nazir İ.Kərimov səfər çərçivəsində rayon mərkəzində yerləşən heyvandarlıq müəssisəsinə, Sərkar kəndində salınmış intensiv şaftalı, nektarin, gilas, ərik və gavalı bağlarına, təkrar qarğıdalı əkinlərinə baş çəkib. Təsərrüfatlarda fermerlərlə açıq sahələrdə keçirilən görüşlərdə aqrar sahədə aparılan islahatlar, kənd təsərrüfatına dövlət dəstəyi, intensiv bağçılığın inkişafı üçün görülən tədbirlər haqqında söhbtlər aparılıb. Təkrar əkinlərin əhəmiyyəti və aqrar sahənin digər aktual məsələləri ətrafında fikir mübadiləsi aparılıb.
