Bayraqdar.info – Qərbi Azərbaycan kəndlərində su qıtlığı yaranıb. Bu barədə Qərbi Azərbaycan əyalətinin Maku, Şot, Poldəşt və Çaldıran bölgələrinin İran parlamentindəki nümayəndəsi Məhəmməd Əlipur açıqlama verib.
Məhəmməd Əlipur deyib ki, son vaxtlar tez-tez baş verən elektrik kəsintisi və içməlu su qitlığı bölgədə əhalinin normal yaşayışına ciddi problemlər yaradıb.
Millət vəkili bildirib ki, elektrik enerjisinin kəsintisi və fasilələrlə verilməsi içməli su təminatında da ciddi çatışmazlıqların ortaya çıxmasına səbəb olub.
İran parlamentinin İqtisadiyyat Komissiyasının üzvü məsullara müraciət edərək deyib ki, əhalini bundan artıq sıxıntıda saxlamaq olmaz.
Məhəmməd Əlipur hazırda Qərbi Azərbaycan əyalətinin ən azı 200 kəndinin əhalisinin içməli su tapmadığını bildirib.
Məsulların su qıtlığının səbəbini vəsait çatışmazlığı ilə əlaqələndirdiyini vurğulayan millət vəkili bildirib ki, bu problemin həll olunmaması yarıtmaz idarəetmə ilə birbaşa bağlıdır.
Millət vəkili bununla məmurların işlərinin öhdəsindən gələ bilmədiklərinə və əhalini sıxıntıda saxladıqlarına işarə vurub.
Qeyd edək ki, yağıntının azalması, içməli su və suvarma şəbəkəsinin köhnəlməsi, yarıtmaz idarəçilik və son ayda başlayan elektrik kəsintiləri ölkədə su böhranının yaranmasına səbəb olub.
Həmçinin rəsmilər tərəfindən Güney Azərbaycanının Təbriz, Səhənd, Miyanə, Bostanabad, Zəngan, Həmədan, Qəzvin və başqa bölgələrində də içməli su problemi yaşandığı və yay mövsümündə su kəsintiləri ola biləcəyi haqda xəbərdarlıq verilir.
Qaynaq: GünAz.TV
