Bayraqdar.info – Güney Azərbaycanın Binab mahalını İran parlamentində təmsil edən Məhəmməd Baqiri Binabi Prezident İbrahim Rəisinin təşkil edəcəyi hökumətlə bağlı açıqlama verib.
Binablı millət vəkili hesab edir ki, yeni prezidentin təşkil edəcəyi hökumətdə də türklərə yer verilməyəcək. O, bu barədə ürəkaçan xəbərlər eşitmədiyini söyləyib.
“Bundan öncəki hökumətlərin tərkibində ölkənin şimal-qərb əyalətlərindən olan şəxslərə ciddi yer verilməyib və azərbaycanlıların dövlətdə iştirakı əhəmiyyətli dərəcədə azalıb.” “Fars” Xəbər Agentliyinin verdiyi məlumata görə, millət vəkili belə deyib.
Məhəmməd Baqiri Binabi deyib ki, yeni hökumətin tərkibində bölgədən ən azı iki-üç nəfər nazir və prezident müavini olmalıdır: “Biz buna çalışacağıq. Bundan öncə bölgədən olan bir neçə nəfər bacarıqlı adamı məsələdən uzaqlaşdırdıq və müxtəlif yollarla onları hörmətdən salıb etibarlarını zədələdik”.
“Ümid edirəm ki, 13-cü hökumətdə Azərbaycana layiq olduğu yer veriləcək. Bu, pay istəmək deyil, sadəcə ölkənin şimal-qərb bölgəsinə lazimi əhəmiyyətin verilmədiyini diqqətə çatdırmaqdır”, – deyə o, İ.Rəisi hökumətində türklərə vəzifə veriləcəyinə ümid etdiyini bildirib.
Bundan bir neçə gün öncə Təbrizin İran parlamentindəki nümayəndəsi Əhməd Əlirzabeygi də buna bənzər fikirlər səsləndirib. O, deyib ki, yeni hökumətin tərkibi ənənəvi qaydada qurulmamalıdır. Əhməd Əlirzabeygi bildirib ki, hökumət üzvləri öncədən seçilmişlər olmamalı, yeni kabinetdə bacarıqlı kadrlara yer verilməlidir.
O, bildirib ki, köhnə və ənənəvi üsullarla kadr seçimi yeni hökumətin də uğursuzluğuna və mövcud problemlərin daha da dərinləşməsinə gətirib çıxaracaq.
Qeyd edək ki, Həsən Ruhani hökumətində 17 nazirdən yalnız biri – Zəngandan olan Əmir Hatəmi türk olub və qalan 16 nazir Tehran, İsfahan, Fars, Kirman, Yəzd, Simnan və Xorasan əyalətlərini təmsil ediblər.
Türklər ölkədə çoxluq təşkil etsə də neçə illərdir müxtəlif əhəmiyyətli qurumlardan, o cümlədən Sistemin Məsləhətini Müəyyənləşdirən Şura, Nəzarət Şurası və başqa nüfuzlu qurumlardan uzaq tutulurlar.
Özəlliklə Həsən Ruhaninin hökuməti dövründə türklərə qarşı ayrı-seçkilik daha qabarıq şəkildə özünü göstərməyə başlayıb. Bu, türk vətəndaşlarla yanaşı bindan öncə əhəmiyyətli vəzifələrdə təmsil olunan azərbaycanlı məmurların, milət vəkillərinin də etirazlarına səbəb olub.
Təhlilçilər bunu mərkəzi hökumətdə təmsil olunanların anti-türk və panfarsist baxışları ilə əlaqələndirir.
Qaynaq: GünAz.TV
