Bayraqdar.info – Mediasiya Şurası ümumi yığıncağının iclası keçirilib.
Şuradan AZƏRTAC-a bildirilib ki, iclasda təşkilati məsələlərə baxılıb, qurumun rəhbər orqanına seçkilər keçirilərək İdarə Heyətinin tərkibi formalaşdırılıb. Hüquq üzrə fəlsəfə doktoru, dosent, Kiçik və Orta Biznesin İnkişafı Agentliyi İdarə Heyəti sədrinin müşaviri Nadir Adilov Mediasiya Şurası İdarə Heyətinin sədri, Vəkillər Kollegiyasının və “Azərbaycan Qiymətləndiricilər Cəmiyyəti”nin üzvü Yusif Allahverdiyev və Qida Təhlükəsizliyi Agentliyinin Hüquq, kadr və icraya nəzarət şöbəsinin müdiri Əli Nəbiyev İdarə Heyətinin üzvləri seçiliblər.
Qeyd edək ki, Prezident İlham Əliyevin rəhbərliyi ilə aparılan mütərəqqi məhkəmə-hüquq islahatları çərçivəsində mübahisələrin məhkəmədən kənar həllində və məhkəmələrin iş yükünün azaldılmasında mühüm vasitə olan mediasiya institutunun təşviqi üzrə ardıcıl tədbirlər görülür. “Mediasiya haqqında” Qanuna uyğun olaraq Mediasiya Şurası yaradılıb. Dövlət başçısının “Məhkəmə-hüquq sistemində islahatların dərinləşdirilməsi haqqında” 2019-cu il 3 aprel tarixli Fərmanının icrası çərçivəsində mediasiya prosesinin tətbiqinə dair maarifləndirmə və təşviqat işləri aparılır. Eyni zamanda, Ədliyyə Nazirliyinin Ədliyyə Akademiyası mediasiya təlimi qurumu kimi Şuraya üzv qəbul edilib. Avropa İttifaqı ilə birgə layihə həyata keçirilərək mediasiya üzrə təlimçilər hazırlanıb, beynəlxalq ekspertlər cəlb olunmaqla Akademiyada mübahisələrin alternativ həlli üzrə təlimçilərinin təlimi təşkil edilib. Layihə çərçivəsində mediasiya təlimlərinə cəlb edilmiş 300-dək namizəd təlimləri uğurla başa vurub və onlara müvafiq sertifikatlar təqdim olunub. Hazırda müraciət etmiş digər şəxslərə mediasiya təlimlərinin keçirilməsi nəzərdə tutulur.
AZƏRTAC bu xəbəri iyulun 1-də yayıb.
Bayraqdar.info əlavə edir ki, quruma rəhbər seçilmiş Nadir Adilov uzun illərdir insan hüquqları, vətəndaş cəmiyyəti və dövlət quruculuğu sahəsində yetərincə təcrübə toplamış şəxsdir. O, cəmiyyət içində özünün müsbət imici ilə fərqlənir. Siyasi mövqeyindən asılı olmayaraq bütün kəsimlər tərəfindən demək olar ki, tənqidsiz qəbul edilir. Bu baxımdan belə bir şəxsin məhz bu quruma rəhbər seçilməsi işin keyfiyyətinin təminatı kimi qəbul edilə bilər.
