Bayraqdar.info – 23-24 iyunda Özbəkistanın Kokand şəhərində Türk Keneşi ölkələri turizm nazirlərinin 6-cı və turizm üzrə işçi qrupunun 15-ci iclası keçirilir.
Xəbəri bayraqdar.info-nun Orta Asiya üzrə media tərəfdaşı Golden Bridge News verib.
Tədbirdə çıxış edən Azərbaycan Dövlət Turizm Agentliyinin sədri Fuad Nağıyev bildirib ki, türk dövlətlərinin ortaq tarix, dil, mədəniyyət və milli kimliyə malik olması onlar arasında iqtisadi münasibətlərin inkişaf etməsinə təkandır.
Agentlik sədri qeyd edib ki, pandemiya səbəbindən ötən il dünya üçün, o cümlədən turizm sənayesi üçün ən çətin illərdən olsa da, Azərbaycan tarixinin ən şanlı illərindən biri olub.
O, Ali Baş Komandanın rəhbərliyi ilə Azərbaycan Ordusunun 30 illik işğala son qoymasının Azərbaycan və region üçün mühüm əhəmiyyət kəsb etdiyini vurğulayıb.
F.Nağıyev Qarabağın turizm əhəmiyyətli məkanlarının böyük bir hissəsinin işğalçılar tərəfindən dağıdıldığı, artıq həmin ərazilərdə quruculuq işlərinə başlanıldığı və işğaldan azad edilmiş ərazilərin böyük turizm potensialına malik olduğu haqqında məlumat verib. O, əlavə edib ki, tezliklə Qarabağ yeni regional turizm mənzili kimi dünyaya təqdim olunacaq.
Tədbirdə iştirak edən üzv dövlətlərin turizm nazirləri Azərbaycanın beynəlxalq hüquqla tanınan ərazi bütövlüyünün bərpa olunması münasibətilə təbriklərini ifadə edərək Qarabağı regional turizm mənzili kimi inkişaf etdirməkdə uğurlar arzulayıblar.
F.Nağıyev təşkilatın “İpək yolu turizm paytaxtları təşəbbüsü” və “Müqəddəs ziyarət” layihələrinin üzv dövlətlərin turizm əhəmiyyətli mədəni irsinin tanıdılmasında, əməkdaşlığın genişləndirilməsində, eləcə də üzv ölkələr arasında turist mübadiləsinin artmasında mühüm rol oynayacağına əminliyini ifadə edib.
O, türk dövlətlərinin paytaxtları və digər şəhərləri arasında birbaşa uçuşların turizmlə yanaşı iqtisadi və ticari əlaqələrin də inkişafına töhfə verəcəyini deyib.
F.Nağıyev 2015-ci ildə turizm nazirlərinin 2-ci görüşünün Azərbaycanda keçirildiyini xatırladaraq ölkənin bir çox beynəlxalq tədbirlərə uğurla ev sahibliyi etdiyini bildirib. O, Türk Keneşi turizm nazirlərinin növbəti – 7-ci görüşünün Azərbaycanda keçirilməsi qərarından məmnunluq duyduğunu bildirərək iştirakçıları ölkəmizə dəvət edib.
İclas çərçivəsində F.Nağıyevlə digər üzv ölkələrin rəsmi nümayəndələri arasında bir sıra ikitərəfli görüşlər keçirilib.
Qeyd edək ki, tədbirdə turizmin bərpası tədbirləri, postpandemiya dövründə əməkdaşlıq, birgə layihələr və fəaliyyət istiqamətləri kimi məsələlər üzrə müzakirələr aparılır.
2009-cu ildə əsası qoyulan təşkilatın turizm nazirlərinin bu ilki görüşündə Türk Keneşinin Baş katibi Bağdad Amreyev, Özbəkistan Baş nazirinin müavini, turizm və idman naziri Aziz Abduxakimov, Qırğızıstan Baş nazirinin müavini, iqtisadiyyat və maliyyə naziri Akılbek Caparov, Türkiyənin mədəniyyət və turizm naziri Mehmet Nuri Ersoy, Qazaxıstanın mədəniyyət və idman naziri xanım Aktotı Raimkulova, eləcə də təşkilatda müşahidəçi statusa malik Macarıstanın Özbəkistandakı səfiri Peter Szanto çıxış edib.
