Son yeniləmə: 24 İyun 2021 14:51
Bayraqdar.info – FIDE iyulun 10-dan avqustun 8-dək Rusiyanin Soçi şəhərində keçiriləcək Kişilər və Qadınlar Arasında Dünya Kuboku iştirakçılarının son siyahısını açıqlayıb. Kişilər arasında Dünya Kubokunda 206 şahmatçı mübarizə aparacaq, 1-ci və 2-ci yeri tutan şahmatçılar iddiaçılar turnirinə vəsiqə qazanacaqlar.
Qadınlar arasında keçiriləcək Dünya Kubokunda isə 103 zəka sahibi mübarizə aparacaq və ilk üçlüyə düşən şahmatçılar iddiaçılar turnirinə vəsiqə qazanacaqlar.
İyulun 10-da Rusiyanın Soçi şəhərində keçiriləcək şahmat üzrə dünya kubokunda iştirak edəcək Azərbaycan şahmatçılarının rəqibləri də müəyyənləşib.
Bu mötəbər turnirdə Şəhriyar Məmmədyarov, Vasif Durarbəyli, Nicat Abasov, Günay Məmmədzadə, Gülnar Məmmədova, Ülviyyə Fətəliyeva və Türkan Məmmədyarova Azərbaycanı təmsil edəcəklər.
Kişilərin yarışında 1/128 final mərhələsindən yalnız Vasif Durarbəyli mübarizəyə qoşulacaq. Bir şahmatçı istisna olmaqla digər təmsilçilər mübarizəyə 1/64 final mərhələsindən başlayacaqlar.
Xəbər bayraqdar.info-ya iyunun 24-də Azərbaycan Şahmat Federasiyasından verilib.
Xəbərdə bildirilir ki, V.Durarbəyli bu mərhələdə Finlandiyanı təmsil edən Dmitri Sklyarovla qarşılaşacaq. Bu cütün qalibini isə növbəti mərhələdə rusiyalı Aleksandr Predke gözləyəcək. Kişilərin yarışında Şəhriyar Məmmədyarov Braziliyanı təmsil edən erməni əsilli Krikor Mxitaryan və meksikalı Karlos Zamorla üz-üzə gələcək. Nicat Abbasov isə venesuelalı Pedro Ramon Reyes və Ermənistan təmsilçisi Şant Sarqisyanla mübarizə aparacaq.
Qadınların yarışına gəlincə, Türkan Məmmədyarova kubalı Tereza Ordaz Valdez, Gülnar Məmmədova estoniyalı Mai Narva, Ülviyyə Fətəliyeva isə hindistanlı Raut Padmini ilə üz-üzə gələcək.
Qadınların yarışında dördüncü təmsilçi Azərbaycanın ən güclü qadın şahmatçısı Günay Məmmədzadə isə mübarizəyə 1/32 mərhələsindən qoşulacaq. Bu mərhələdə o, rəqibi slovakiyalı Laura Unuk və suriyalı Şafa Şruk cütüylə yarışacaq.
