Bayraqdar.info – YARAT Müasir İncəsənət Məkanının təşkilatçılığı ilə Azərbaycan Rəngkarlıq Muzeyində açılan sərgilər artıq yay rejimində fəaliyyət göstərir.
YARAT-dan bayraqdar.info-ya bildirilib ki, sərgilərlə tanış olmaq istəyənlər çərşənbə axşamı və bazar günü olmaqla saat 12:00-dan 20:00-dək bələdçi ilə sərgiyə baxış keçirə bilər. Eyni zamanda saat 21:00-dan 22:00-dək sərgiyə sərbəst (bələdçisiz) baxmaq mümkündür.
Qeyd edək ki, hazırda muzeydə rəssam Rəşad Ələkbərovun “Özünsən!” solo sərgisi və “XX əsrin son çiçəkləri: Y nəsli” qrup sərgisi, eləcə də “Öz adanı kəşf et” adlı sərgi ziyarətçilər üçün açıqdır.
“Özünsən!”
YARAT-dan bildirilib ki, “Özünsən!” rəssam R.Ələkbərovun eksperiment çərçivəsindən kənara çıxmış multidistiplinar fərdi sərgisidir. Sərgi, rəssam yaradıcılığında müxtəlif materiallarla yeni təcrübə olmaqla yanaşı, onun praktikasını yeni və gözlənilməz tərzdə təqdim edir. İmmersiv layihədə rəssamın YARAT-ın sifarişi ilə hazırladığı yeni heykəl və quraşdırmaları nümayiş olunur.
“Xitabən, R.Ələkbərovun “Özünsən!” sərgisi tamaşaçı ilə səssiz, lakin düşünməyə vadar edən bir dialoqudur. Bu dialoqun baş tutmasının əsas açar elementi labirintdir. O, insanı həqiqətə/özünüdərkə aparan yol simvolu kimi hərəkət, yenilənmə və yeni doğuluş ideyasından çıxış edir. “Makqaffin effekti”ni nəzərdə tutaraq, rəssam labirint kontekstindən çıxış edir və əşyanın/hadisənin deyil, prosesin/yolun önəmli olduğunu vurğulayır. Alleqoriya və metaforalar dili ilə danışan qiraşdırmalar insan varlığının ən dərin qatlarına baş vuraraq ikimənalı fikirləri üzə çıxarır. Bu anlayışdan qaynaqlanaraq, R.Ələkbərovun bəşəriyyət və cəmiyyət, yaranış və varlıq, yaddaş və xatirə, etiqad, siyasi strukturlar, kitç mədəniyyətinə əsaslanan müraciəti və onun istinadlarının əsas ünvanı məhz insanın özüdür. Sərgi, labirint mövzusunun adaptasiyasından daha çox, onun transformasiyası və ideyasının genişləndirilməsini əks etdirir”, – deyə YARAT qeyd edir.
Məlumatda bildirilir ki, bu “səyahətdə” müxtəlif “alətlərdən” istifadə edərək rəssam keçmiş və baş verən proseslərdən danışır. Labirintin əsas obrazlarından biri, Krit çarı Minosun qızı Ariadnanın qırmızı sapına istinadən, rəssam labirint boyunca yönəldici mesajlar yazır. Bu mesajlar sərgidə olan əsərlərin başa düşülməsində köməkçi vasitə və layihə konseptinə tabe olmaq fikirləri kimi səsləndirilir. Avropa dəyərlərini mədəni və mənəvi prizmadan açıqlayaraq, rəssam Şərq fəlsəfi fikri və mifologiyası ilə kəsişən paralellər qurur.
Avtobioqrafik elementlərin mövcud olduğu əsərlərdə rəssam xatirə və yaddaş mövzusuna toxunur. Bu leytmotivi təşkil edən komponentlərə uşaqlıq oyunlarından tutmuş postsovet ölkəsinin məişətinə qədər olan fraqmentlər aiddir. Yığılmamış pazlın hissələri kimi bu fraqmentlər bütün labirint boyunca səpələnib. “Mən burada olmuşam” kəlməsi isə R.Ələkbərovun Venesiya Biennalesindəki layihəsini xatırladaraq, həm də lokal xarakterli submədəniyyətlərə istinadıdır.
Sərginin kuratoru Fərəh Ələkbərlidir.
