Bayraqdar.info – İranın dövlət radio-televizyasında yenidən Azərbaycan türklərini aşağılayan sözlər işlədilib. Kanalda yayımlanan “Gisu” adlı serialda Peyman rolunu oynayan aktyor Humən Seyyidi, Rza rolunu oynayan Hüseyn Yariyə təhqiramiz səkildə bildirir ki, “o, təbrizlidir, söz anlamır, heç nə demə”.
Xatırladaq ki, bu, İranda ilk belə hal deyil. Belə ki, İran hökuməti hər zaman Azərbaycan türklərinə qarşı aşağılayıcı verilişlər və yazılar yayımlayır.
2006-cı ilin may ayında “İran” qəzetində türkləri aşağılayan material və karikaturanın nəşri Güney Azərbaycan və İran şəhərlərində geniş etiraz aksiyalarının keçirilməsinə səbəb olmuşdu.
Təxminən 10 gün davam edən və 1 Xordad (22 May) Hərəkatı adı alan aksiyalar zamanı onlarla Azərbaycanlı öldürülmüş, yüzlərlə insan yaralanmış və çox sayda etirazçı həbs olunmuşdu.
2015-ci ilin noyabr ayında İran televizyasında yayınlanan təhqiramiz “Fitilə” verilişində də türklər kobud şəkildə təhqir edilmişdi.
Bu səbəbdən Güney Azərbaycanın müxtəlif şəhərlərində kütləvi etiraz aksiyaları keçirilmışdi. Həmin aksiyalar irqçiliyə qarşı yürüş kimi yadda qalmışdı. Yürüşlərdə onlarla etirazçı yaxalanaraq məhkəmə qarşısına çıxarılmışdı. Lakin bütün etirazlara baxmayaraq “Fitilə” qrupu və onun üzvləri məsuliyyətə cəlb olunmamışdı.
Qaynaq: GünAz.TV
