Bayraqdar.info – Respublika Gənclər Kitabxanası xarici ədəbiyyat nümayəndələri haqqında materialların hazırlanması işində həmişə fəallıq nümayiş etdirir. Bundan məqsəd gənc nəslin dünya klassiklərini tanımaları, dünya ədəbiyyatı incilərini mütaliəsi və təbliğini təşkil etməkdir.
Bu barədə C.Cabbarlı adına Respublika Gənclər Kitabxanasından bayraqdar.info-ya məlumat verilib.
Kitabxana əməkdaşları A.Kuprin, A.Qriboyedov, A.Blok, A.Çexov, V.Belinski, M.Bulqakov, A.Axmatova, F.Dostoyevski, İ.Turgenev, S.Yesenin və b. haqqında Azərbaycan və rus dillərində virtual kitab sərgiləri hazırlayıb. Həmçinin, biblioqrafik icmallar, videoçarxlar da istifadəçilərə təqdim edilib.
Kitabxanadan bildirilib ki, əksəriyyəti rus dilində olan bu vəsaitlərin bəziləri yazı materialları əsasında, digərləri isə səsli formada hazırlanıb. Hazırlanan materiallarda rus ədəbiyyatı nümayəndələrinin həyat yolu, yaradıcılıq mərhələləri haqqında geniş, ətraflı məlumat verilib.
Vəsaitlərdə klassiklərin müəllifi olduqları əsərlər haqqında söhbət açılır, onların kitabları nümayiş etdirilir. Burada onlar haqqında maraqlı faktlar, əsərlərindən parçalar, şəxsi fotoalbomlarından şəkillər paylaşılır. Rus ədəbiyyatının parlaq simaları ilə tanış olmaq, onların həyat və yaradıcılıqları, əsərləri haqqında məlumat almaq istəyən izləyicilər üçün bu materiallar əsl hədiyyədir.
Respublika Gənclər Kitabxanası gələcəkdə də bu yöndə fəaliyyətini davam etdirəcək. Nəinki, rus ədəbiyyatı nümayəndələri, həmçinin dünya ədəbiyyatı klassikləri və çağdaş dövrün parlaq simaları ilə də oxucuları tanış etmək planlaşdırılır.
İzləyicilər sözügedən materiallara kitabxananın rəsmi saytında, sosial şəbəkə səhifələrində və YouTube kanalında baxa bilərlər.
