Son yeniləmə: 17 İyun 2021 19:14
Bayraqdar.info – Dövlət Rəsm Qalereyası və Xətai Sənət Mərkəzinin təşkilatçılığı ilə “Nizami Gəncəvi İli” çərçivəsində “Mənim düşüncəm-2021” adlı uşaq rəsm müsabiqəsi elan olunub.
Xəbər bayraqdar.info-ya Dövlət Rəsm Qalereyasından verilib.
Müsabiqənin dəstəkçiləri Mədəniyyət və Təhsil nazirlikləri, Az.TV, Xətai Rayon İcra Hakimiyyəti, Azərbaycan Rəssamlar İttifaqı, Naxçıvan Rəssamlar Birliyidir.
Müsabiqədən məqsəd yay tətilində rəssamlıq istedadı olan uşaq və gənclərin diqqətini çəkən mənzərə, hadisə və əşyaları öz düşüncələri ilə təsvir etdirmək bacarıqlarının inkişafıdır.
Yaşı 21-ə qədər olan istedadlı şəxslər 2021-ci il oktyabrın 10-dək müsabiqədə iştirak edə bilərlər. Onlar BXSM-in facebook qrupuna əsərin fotosunu, adını, müəllifin adı, soyadı, təvəllüdü, təhsil aldığı məktəbi və əlaqə nömrəsini yerləşdirməklə müsabiqəyə qatıla bilərlər. (https://www.facebook.com/groups/144172178999749/?ref=share)
Rəsm Qalereyasından bayraqdar.info-ya bildirilib ki, əsərlər tək-tək yerləşdirilməli, məlumatlar dolğun olmalı, 2-dən çox əsər göndərilməməlidir.
Mövzu sərbəstdir. Ən çox uşaqların öz duyğu və düşüncələri ilə işlənmiş əsərlər seçiləcək. Seçim zamanı müəllifin yaşı nəzərə alınmaqla düzgün kompozisiya, rəng seçimi və ideya əsas götürüləcək.
Seçim zamanı kənar (müəllim, valideyn) müdaxiləsiz işlərə üstünlük veriləcək.
Müsabiqədə xarici ölkə vətəndaşları da iştirak edə bilər. Seçim 3 yaş kateqoriyası üzrə aparılacaq və hər yaş kateqoriyasına ayrıca sərgi açılacaq.
Kateqoriyalar əsasən 11 yaşa qədər, 11-16 və 16-21 yaş arası nəzərdə tutulur.
Birinci turdan keçmiş müəlliflərin əsərləri sərgidə nümayiş olunmaq üçün Mərkəzə dəvət olunacaq.
Müsabiqənin nəticələrindən narazı qalanlar seçimlərin elan olunduğu vaxtdan 3 iş günü ərzində münsif üzvünün nəzarəti ilə rəsm çəkməklə özünü təsdiq edə bilər.
Sərgidə nümayiş olunan müəlliflər sertifikatla və təşəkkürnamə ilə təltif olunacaqlar.
