Bayraqdar.info – Pandemiya səbəbindən 2020-2021-ci tədris ilinin əhəmiyyətli hissəsi distant formada təşkil edilib. Məsafədən təhsil şagirdlərə bilik və bacarıqların mənimsənilməsində müəyyən çətinliklər yaradıb. Şagirdlərin bilik və bacarıqlarının möhkəmləndirilməsi, öyrənilənlərin ümumiləşdirilməsi məqsədilə iyunun 16-da ümumi təhsil müəssisələrində yay məktəbinə başlanılır.
Təhsil Nazirliyindən bayraqdar.info-ya bildirilib ki, iyunun 30-dək davam edəcək yay məktəbi ərzində dərslərin sayı və qrafikində şagirdlərin yaş xüsusiyyətləri nəzərə alınacaq. Yay məktəbində bütün ümumi təhsil müəssisələrinin 1-10-cu sinif şagirdləri ödənişsiz və könüllü əsaslarla iştirak edə bilər.
1-4-cü siniflərdə tədris həftədə 5 dəfə, gündəlik 4 saat olmaqla, 5-10-cu siniflərdə isə həftədə 5 dəfə, gündəlik 3-4 saat olmaqla təşkil ediləcək. 1-4-cü siniflərdə məşğələlər tədris dili, riyaziyyat, xarici dil fənləri üzrə keçiriləcək. 5-10-cu siniflərdə məşğələlər tədris dili, riyaziyyat, xarici dil fənləri və ümumi təhsil müəssisəsinin rəhbərliyinin qərarı ilə digər 3 fənnə aid olacaq.
