Bayraqdar.info – Azərbaycan Danimarka ilə əlaqələrin genişlənməsində maraqlıdır. Bunu İqtisadiyyat naziri Mikayıl Cabbarov Danimarka Krallığının ölkəmizdə yeni təyin olunmuş qeyri-rezident səfiri Danni Annanla görüşündə deyib.
Nazirlikdən bayraqdar.info-ya verilən məlumata görə, görüşdə əməkdaşlığın inkişafı üçün müqavilə-hüquq bazasının gücləndirilməsinin önəmi qeyd olunub.
Nazir ticarətin ölkələrimiz arasında tərəfdaşlığın əsas istiqamətlərindən olduğunu bildirib. M.Cabbarov ötən il Azərbaycan və Danimarka arasında ticarət dövriyyəsinin 2019-cu ilə nisbətən 2 dəfədən çox artığını diqqətə çatdırıb. O, ölkəmizdə Danimarkanın Carlsberg, Maersk kimi transmilli şirkətlərinin fəaliyyətini qeyd edib.
İqtisadiyyat naziri Azərbaycanda həyata keçirilən islahatlar, qeyri-neft sektorunun və rəqəmsal iqtisadiyyatın inkişafı, ölkəmizin sosial-iqtisadi inkişafına dair milli prioritetləri barədə məlumat verib. Danimarka şirkətlərini Azərbaycanın əlverişli biznes və investisiya mühitindən, nəqliyyat-logistika potensialından yararlanmağa dəvət edib.
Səfir Danni Annan ölkəsinin Azərbaycanla əlaqələrin genişlənməsində maraqlı olduğunu vurğulayıb. O, diplomatik fəaliyyəti dövründə iqtisadi əməkdaşlığın möhkəmləndirilməsinə səy göstərəcəyini bildirib.
Görüşdə iqtisadi tərəfdaşlığın inkişafı imkanları və qarşılıqlı maraq doğuran digər məsələlər barədə fikir mübadiləsi aparılıb.
