Bayraqdar.info – İyunun 14-də futbol üzrə Avropa çempionatında daha üç oyun keçiriləcək. Qarşılaşmaların biri D, ikisi isə E qrupunda olacaq.
Xəbər bayraqdar.info-ya AFFA-dan verilib.
Xəbərdə bildirilir ki, günün ilk oyunu D qrupunda Şotlandiya və Çexiya yığmaları arasında olacaq. Qlazqodakı “Hampden Park” stadionunda oynanılacaq görüş Bakı vaxtı ilə saat 17:00-da başlayacaq. Qarşılaşmanı Almaniyalı Daniel Zibert idarə edəcək. Bu qrupun ötən gün keçirilən görüşündə İngiltərə Xorvatiyanı minimal hesabla üstələyib – 1:0.
E qrupunda üçqat Avropa çempionu İspaniya İsveçlə üz-üzə gələcək.
Bildirilir ki, Avro-2020 öncəsi ispanların heyətində Diego Lorente və Serxio Busketsin koronavirus testi müsbət çıxıb. Sloveniyalı Slavko Vinçiçin idarə edəcəyi qarşılaşma Sevilya şəhərindəki “Estadio La Cartuja” stadionunda gerçəkləşəcək.
Qrupun digər iddialı komandası Polşa Slovakiyanı sınağa çəkəcək.
Rusiyanın Sankt-Peterburq şəhərindəki eyniadlı stadiondakı qarşılaşmanın baş hakimi Rumıniyadan Ovidiu Hategan olacaq.
