Bayraqdar.info – Xarici İşlər naziri Ceyhun Bayramov iyunun 11-də Somali Federativ Respublikasının ölkəmizdə akkreditə olunmuş qeyri-rezident səfiri Cama Abdullahi Mohamed ilə görüşüb.
XİN-dən bayraqdar.info-ya verilən məlumata görə, görüşdə nazir C.Bayramov Somali ilə mövcud dostluq və əməkdaşlıq münasibətlərindən məmnunluqla bəhs edib. Bu əməkdaşlığın, həmçinin beynəlxalq platformalarda uğurla davam etdirildiyi vurğulanıb. Somalinin Azərbaycanın beynəlxalq hüquqa əsaslanan mövqeyinə verdiyi dəstəyi məmnunluqla ifadə olunub.
Səfir C.A.Mohamed Somalinin Azərbaycanın beynəlxalq hüquqa əsaslanan haqlı mövqeyinə hər zaman dəstək verdiyini qeyd edib. Diplomat Azərbaycan xalqını və dövlətini qazanılmış böyük Qələbə münasibətilə təbrik edib.
XİN-dən bayraqdar.info-ya verilən daha bir xəbərdə deyilir ki, C.Bayramov iyunun 11-də Monteneqronun ölkəmizə yeni təyin edilmiş qeyri-rezident səfiri Perişa Kastratoviçi də qəbul edib.
Görüşdə C.Bayramov P.Kastratoviçə fəaliyyətində uğurlar arzulayıb. Səfirə həmçinin münaqişədən sonra bölgədə mövcud vəziyyət, azad olunmuş ərazilərdə həyata keçirilən bərpa və quruculuq işləri haqqında məlumat verilib. İşğal amilinin aradan qaldırılması ilə Ermənistanla münasibətlərin normallaşdırılması imkanının yarandığı qeyd olunub.
Səfir Perişa Kastratoviç ölkəsinin Azərbaycan ilə münasibətlərə əhəmiyyət verdiyini vurğulayıb.
Bayraqdar.info-ya XİN-dən daxil olan digər bir məlumatda isə bildirilir ki, nazir C.Bayramov iyunun 11-də Yeni Zelandiyanın ölkəmizə yeni təyin edilmiş qeyri-rezident səfiri Vendi Hintonu da qəbul edib.
Digər görüşlərdə səsləndirilən fikirlər bu görüşdə də diqqətə çatdırılıb.
Redaktə və əlavə: Azər HƏSRƏT
