Bayraqdar.info – Bu yaxınlarda Gəncə Hava Limanında Gəncə-Sankt-Peterburq aviareysi ilə səyahət etmək istəyən sərnişinlərə koronavirus infeksiyasına dair saxta arayışların verilməsi ilə bağlı məlumatlar yayılıb. Bu arayışların “Leyla Medical Center” və “Oxygen” klinikasından verilməsi barədə informasiyalar Baş Pokurorluq tərəfindən araşdırılıb.
Məlum olub ki, bu saxta arayışlar “ƏSR” və “Arkan Tour” MMC-nin vəzifəli şəxsləri tərəfindən hazırlanıb. Klinikaların xəbəri olmadan hazırlanan arayışlar Gəncə Beynəlxalq Hava Limanından Sankt-Peterburq şəhərinə səyahət edən 96 nəfərə verilib.
Məlumat iyunun 11-də Baş Prokurorluqdan verilib.
Prokurorluq tibb müəssisələrinin adından tərtib edilmiş neqativ test nəticələri ilə bağlı saxta sənədlərin sərnişinlərə pulla satılmasına şübhələr müəyyən edib.
Fakta görə “ƏSR” və “Arkan Tour” MMC-nin vəzifəli şəxsləri barəsində AR CM-nin 308.1 (vəzifə səlahiyyətlərindən sui-istifadə etmə) və 320.1-ci (rəsmi sənədləri saxtalaşdırma) maddələri ilə cinayət işi başlanıb. Hazırda cinayət işinin istintaqı davam etdirilir.
