Bayraqdar.info – Ümumdünya Mətbuat Şuraları Assosiasiyasının (WAPC) quruluş ildönümünə həsr edilmiş onlayn konfrans keçirilib. Toplantıda Kəlbəcərdə mina partlayışı nəticəsində həlak olmuş azərbaycanlı jurnalistlər anılıb.
Tədbirdə çıxış edən Azərbaycan Mətbuat Şurasının sədri, Ümumdünya Mətbuat Şuraları Assosiasiyası sədrinin birinci müavini Əflatun Amaşov təşkilatın yaranmasında və inkişafında xidmətləri olanların daim hörmətlə yada salındığını bildirib.
Onun təklifi ilə COVID-19 infeksiyasından dünyasını dəyişmiş, eləcə də, xidməti vəzifəsini yerinə yetirərkən həlak olmuş jurnalistlərin xatirəsi bir dəqiqəlik sükutla anılıb.
Ə.Amaşov koronavirus pandemiyasının jurnalistikaya vurduğu zərbələrdən danışıb. O, WAPC-ın pandemiya şəraitində jurnalistlərin hüquqlarının qorunması ilə bağı hokumətlərə müraciətlər ünvanlamasını yüksək qiymətləndirib. MŞ sədri bildirib ki, jurnalistlərin istər pandemiya zamanı, istərsə də müxtəlif qaynar bölgələrdə həyatlarını itirmələri onların peşə fəaliyyətlərinin riskli mahiyyətindən irəli gəlir.
Ə.Amaşov qeyd edib ki, WAPC Kəlbəcərdə mina partlayışı nəticəsində həyatını itirmiş Azərbaycanın media təmsilçiləri ilə bağlı bəyanat yayıb. Qarabağda və digər işğaldan azad edilmiş Azərbaycan ərazilərində jurnalistlərin informasiya əldə etmək hüququna təhdid var. “Bu təhdid tək Azərbaycan jurnalistləri üçün deyil, ora xaricdən də media nümayəndələri yollanır. Deməli, təhdidin miqyası daha böyükdür. Bizim acımızla bağlı üzüntülərini paylaşan Türkiyə, Pakistan, Kuzey Kıbrıs Türk Cümhuriyyəti, Kosova, Hindistan, Rusiya, Keniya, Uqanda, Tanzaniya, Şimali Makedoniyadan olan həmkarlarıma təşəkkürümü bildirirəm. Eyni zamanda Beynəlxalq Jurnalistlər Federasiyasının, Avropa Jurnalistlər Federasiyasının rəhbərliyinə də hadisə ilə əlaqədar tutduqları obyektiv mövqeyə görə minnətdaram”, – deyə Ə.Amaşov vurğulayıb.
Toplantıda çıxış edən WAPC sədri Şule Aker, Keniya MŞ-nın sədri David Omvoyo, Nepal MŞ-nın sədri Kişor Şresta , Hindistan MŞ sədri C.Nayak, qurumun məsul nümayəndəsi Tamer Atabarut, Türkiyə MŞ-nın sədri Pınar Turenç və başqaları mina partlayışı nəticəsində həlak olmuş azərbaycanlı jurnalistlərlə bağlı başsağlığı veriblər.
