Son yeniləmə: 9 İyun 2021 19:43
Bayraqdar.info – Azərbaycan Dövlət Rəssamlıq Akademiyasının 2-ci kurs magistr tələbəsi Jalə Əliyeva Vətən müharibəsində şəhid olmuş Xudayar Yusifzadənin büstünü hazırlayaraq AMEA Milli Azərbaycan Tarixi Muzeyinə bağışlayıb.
Xəbər bayraqdar.info-ya Muzeydən verilib.
Xəbərdə bildirilir ki, keçirilən görüşdə Muzeyin baş direktoru, akademik Nailə Vəlixanlı, Muzeyin Elmi ekspozisiya və sərgilərin təşkili şöbəsinin və Beynəlxalq əlaqələr şöbələrinin əməkdaşları iştirak edib.
N.Vəlixanlı çox incə, zərif və şəhidimizə layiq bir sənət əsəri yaratdığına, eləcə də bu əsəri təmənnasız olaraq Muzeyə hədiyyə etdiyinə görə Jalə xanıma təşəkkürünü bildirib. Gənc heykəltəraş işinin yüksək qiymətləndirilib Muzeyin fonduna daxil edilməsindən qürur hissi keçirdiyini vurğulayaraq başqa şəhidlərimizin büstləri üzərində də çalışdığını deyib.
Muzey adından J.Əliyevaya təşəkkürnamə və xatirə hədiyyələri verilib.
Büst “Dastana dönmüş bir şəhid ömrü (Şəhid Xudayar Yusifzadə)” adı ilə Muzeyin Vətən müharibəsi fonduna daxil edilib.
Heykəltəraş J.Əliyevanın hazırladığı büstlə hazırda Muzeydə davam edən “Anadır arzulara hər zaman Qarabağ” sərgisində tanış olmaq olar.
