Bayraqdar.info – İyunun 9-da Bakının Nərimanov, Nəsimi, Qaradağ rayonlarında, Naftalan şəhərində, Abşeron, Ağdam, Goranboy, Masallı, Sabirabad, Şamaxı, Tərtər, Xaçmaz və Zaqatala rayonlarında imtahanlar keçiriləcək.
Dövlət İmtahan Mərkəzindən bayraqdar.info-ya bildirilib ki, imtahanlarda 21 min 423 nəfər 9-cu sinifi bitirmiş şagirdin iştirakı gözlənilir.
İmtahanlar saat 11:00-da başlanacaq. Saat 10:45-də buraxılış rejimi başa çatacaq. Bundan sonra gələn iştirakçılar imtahan binasına buraxılmayacaq.
DİM bildirir ki, kütləviliyin və təmas hallarının qarşısının alınması məqsədilə imtahan binasına müxtəlif daxil olma vaxtları müəyyən edilib. Buraxılış vərəqəsində həmin vaxt göstərilib. Ona görə də imtahan binasına buraxılış vərəqəsində qeyd olunan vaxtda gəlmək tövsiyə edilir.
DİM həmçinin, imtahanda iştirak qaydalarını da açıqlayıb. Qaydalara görə, iştirakçılar imtahana tibbi maska ilə gəlməli və onlardan düzgün (burun, ağız və çənə nahiyəsini tam örtməklə) istifadə etməlidirlər. Maskanı çıxarmaq qadağandır və bütün proses boyu (buraxılış rejimi, imtahan müddəti, imtahan binasının tərk edilməsi) onda istifadə olunmalıdır.
Şagirdlər imtahana aşağıda qeyd edilən sənədləri gətirməlidirlər:
– İmtahana buraxılış vərəqəsi;
– Sağlamlıq haqqında bəyannamə (buraxılış vərəqi ilə birlikdə çap edilir) və imzalanır. Şagird imtahana buraxılış vərəqini və sağlamlıq haqqında bəyannaməni imtahan nəzarətçisinə təhvil verir. Ona görə də hər iki sənəd ayrıca vərəqdə çap olunmalıdır;
– Şəxsiyyəti təsdiq edən sənədin əsli:
a) Azərbaycan Respublikasının vətəndaşları (16 yaşı tamam olmayan iştirakçılar da daxil olmaqla) şəxsiyyət vəsiqəsini;
b) əcnəbilər və vətəndaşlığı olmayan şəxslər Dövlət Miqrasiya Xidməti tərəfindən verilmiş icazə vəsiqələrini; qaçqın statusu almış xarici vətəndaşlar və onların ailə üzvləri isə qaçqın vəsiqələrini;
– Şəxsiyyət vəsiqəsində şəkli olmayan iştirakçılar digər sənədlərlə yanaşı məktəbin verdiyi və fotoşəkilləri yapışdırılmış arayışı gətirməlidir. Arayışa iştirakçının 3×4 sm ölçülü şəkli yapışdırılır və şəkil möhürlə təsdiqlənir.
Şagirdlər imtahana buraxılış vərəqini internet vasitəsilə DİM-in saytından iyunun 1-dən etibarən çap edib götürə bilər.
İmtahan binasına daxil olan iştirakçıların məsafədən ölçə bilən elektron termometrlə bədən hərarətləri yoxlanılacaq. Zəruri dezinfeksiyaedici vasitələrdən istifadə olunacaq. Bədən hərarəti 37°C-dən aşağı olan şəxslər imtahana buraxılacaq.
İştirakçı şəxsiyyətini təsdiq edən sənədin üz tərəfini DİM əməkdaşının görəcəyi şəkildə ona tərəf uzatmalı və maskasını aşağı salaraq üzünü göstərməlidir. Bu proses sosial məsafəni saxlamaqla həyata keçirilməlidir.
İmtahanların keçirilmə qaydalarına dair maarifləndirici videoçarx və davranış qaydaları ilə Mərkəzin saytında tanış olmaq mümkündür.
