Bayraqdar.info – C.Cabbarlı ad. Respublika Gənclər Kitabxanası senarist, dramaturq, Dövlət mükafatı laureatı, Xalq şairi Vaqif Səmədoğlunun xatirəsinə həsr olunmuş videoçarx hazırlayıb. Videoçarx şairin iyunun 5-nə təsadüf edən doğum gününə həsr edilib.
Kitabxanadan bildirilib ki, videoçarxda V.Səmədoğlunun həyat və yaradıcılığı haqqında məlumat verilib, müəllifi olduğu kitablardan nümunələr nümayiş olunub.
Qeyd edilir ki, V.Səmədoğlunun yaradıcılığı müasir Azərbaycan ədəbiyyatında yeni poeziyanın xüsusi mərhələsini təşkil edib.
V.Səmədoğlu yaradıcılığında həyat və zaman, dünya və insan haqqında lirik-fəlsəfi düşüncələrini oxucuya, dinləyiciyə çatdırmaq istedadına malik şair olub. O, teatr və kino üçün yüksək sənətkarlıq keyfiyyətlərinə malik silsilə əsərlərin müəllifi idi.
Kitabxananın əməkdaşları tərəfindən hazırlanan videoçarxda V.Səmədoğonun sağlığında qonaq olduğu televiziya verilişlərində verdiyi müsahibələrdən parçalar təqdim edilib. Videomaterialda görkəmli ədibin öz səsi ilə həyat, azadlıq, xoşbəxtlik anlayışlarına verdiyi təriflər, atası Səməd Vurğun haqqında söylədiyi xatirələr izləyicilərə təqdim olunub.
Videoçarxda V.Səmədoğlunun şəxsi ailə fotoalbomundan görüntülər nümayiş etdirilib. Xalq artisti Fəxrəddin Manafovun ifasında şairin müəllifi olduğu şeir parçası da səsləndirilib. Ümumilikdə videoçarx sevimli şairin canlı görüntüləri və səs yazıları ilə zəngindir.
