Son yeniləmə: 7 İyun 2021 17:09
Bayraqdar.info – İyunun 7-də Hərbi Qənimətlər Parkında Təhsil Nazirliyi tərəfindən “Biz zəfər qazandıq!” Respublika onlayn rəsm müsabiqə-sərgisinin qaliblərinin mükafatlandırılması mərasimi keçirilib. Tədbirdə ümumtəhsil məktəblərinin şagirdləri və məktəbdənkənar təhsil müəssisələrinin dərnək üzvləri iştirak edib.
Nazirlikdən bildirilir ki, öncə tədbir iştirakçıları müsabiqəyə təqdim edilmiş rəsm işləri ilə tanış olublar.
Tədbir Azərbaycan Respublikasının Dövlət himninin səsləndirilməsi ilə başlanıb.
Təhsil nazirinin müavini Firudin Qurbanov istedadlı uşaq və gənclərin aşkar edilməsi, böyüməkdə olan gənc nəsildə hərbi vətənpərvərlik ruhunun təbliği baxımından bu sərgini yüksək qiymətləndirib.
Nazir müavini çıxışının sonunda qalibləri təbrik edib, onlara uğurlar arzulayıb.
Tədbirdə Azərbaycan Rəssamlar İttifaqının sədri, Xalq rəssamı Fərhad Xəlilov və Azərbaycan Dövlət Rəssamlıq Akademiyasının prorektoru, Xalq rəssamı Səlhab Məmmədov də çıxış edib.
Onlar mükafatlandırma mərasiminin Hərbi Qənimətlər Parkında keçirilməsinin xüsusi önəmini vurğulayıb, qalibləri təbrik ediblər.
Çıxışlardan sonra müsabiqə-sərgidə 1, 2, 3-cü və həvəsləndirici yerlərə layiq görülmüş məktəblilər təltif olunub, onlara diplom və hədiyyələr təqdim edilib.
Qeyd edək ki, 3 yaş (6-9, 10-13, 14-17) qrupu üzrə keçirilən müsabiqə-sərgiyə ümumilikdə 1127 rəsm işi daxil olub.
İşlər Azərbaycan Dövlət Rəssamlıq Akademiyasının professorları Ziyadxan Əliyev, Məmmədhüseyn Hüseynov və Azərbaycan Rəssamlar İttifaqının üzvü İnna Viktorovna Bəşirova tərəfindən qiymətləndirilib.
