Bayraqdar.info – İyunun 4-dən 2021-2022-ci tədris ili üçün müəllimlərin işə qəbulu üzrə müsabiqənin elektron sənəd qəbuluna başlanılır.
Təhsil Nazirliyindən verilən xəbərdə bildirilir ki, elektron sənəd qəbulu prosesi 4-11 iyun tarixlərini əhatə edəcək.
Müsabiqə 4 mərhələdən (elektron ərizələrin yoxlanılması, imtahan, boş yerlərin seçimi və müsahibə) ibarətdir.
Müsabiqənin ilk – elektron sənəd qəbulu mərhələsində namizədlər qeydiyyatdan keçməlidir.
Nazirlik qeyd edir ki, müsabiqədə orta ixtisas və ali təhsil müəssisələrini pedaqoji ixtisaslar üzrə bitirmiş, dövlət nümunəli təhsil sənədi almış şəxslər iştirak edə bilər.
Həmçinin, xarici ölkədə aldığı ali təhsil haqqında sənədi tanınmış Azərbaycan vətəndaşları və ya ölkəmizdə daimi yaşamaq üçün icazə verilmiş şəxslər müsabiqəyə qatıla bilər.
