Bayraqdar.info – ABŞ Dövlət katibi Entoni Blinken 1989-cu ildə Pekində (Çin) baş vermiş Tiananmen hadisələrinin 32-ci ildönümü münasibətilə açıqlama yayıb.
ABŞ Dövlət Departamentindən bayraqdar.info-ya daxil olan açıqlamada Çinin insan haqlarını kütləvi şəkildə pozmasına təkrar diqqət çəkilir. ABŞ eyni zamanda vurğulayır ki, Çin dövlətinin bu davranışları insan hüquq və azadlıqlarına ziddir.
Açıqlamada xatırladılır ki, 1989-cu il iyunun 4-də Çin dövləti minlərlə etirazçının insan hüquqları tələblərini dinləmək yerinə onları susdurmaq üçün zorakı yollara əl atdı. Halbuki insanları sadəcə dinləmək, hüquq və azadlıqlarının təmin edilməsi yönündə davranmaq olardı.
“Bu insanların çox sadə tələbi vardı: bizim Ümumdünya İnsan Hüquqları Bəyannaməsində nəzərdə tutulan insan hüquqlarımızı tanıyın və hörmət edin. Bu tələbə layiqincə və açıq müzakirələrlə cavab vermək yerinə Çin rəsmiləri zor tətbiq etdilər. İyunun 4-də çiyin-çiyinə durmuş o insanların cəsarəti bizi heç vaxt o günlərin hadisələrilə bağlı şəffaflıq tələbindən geri çəkilməməyə sövq edir”, – deyə açıqlamada bildirilir.
Daha sonra qeyd edilir ki, Tiananmen hadisələri sonrakı mərhələdə demokratiya və azadlıq uğrunda mübarizədə əks olundu. Özəlliklə də hazırda o hadisələri xatırlamaq üçün tədbirlər keçirmək istəyən Hong Kongda.
“ABŞ öz hökumətindən bəşəri insan hüquqlarına hörmət tələb edən Çin xalqı ilə həmrəyliyini davam etdirəcək. Biz 32 il öncə özünü qurban verərək öldürülənləri və bu günümüzdə də hakimiyyətin davam edən basqılarına məruz qalanları xatırlayırıq”, – deyə E.Blinken bildirir.
Xatırlatma: Açıq mənbələrə görə, Tiananmen hadisələri 1989-cu ilin 4 iyununa təsadüf edir. Hələ həmin ilin aprelindən başlayaraq tələbələr öndə olmaqla minlərlə insan Pekin küçələrinə çıxaraq islahat tələb edirdi. Bu tələblər hər keçən gün artdıqca etirazçıların da sayı artırdı. Ona görə də kommunist Çin hökuməti etirazları güc yoluyla yatırmaq qərarına gəlmişdi. Nəticədə iyunun 4-də Çin ordusu ağır texnika və silahların müşayiətilə etirazçıların üzərinə yeridilmişdi. Bu isə qeyri-rəsmi məlumatlara görə bir neçə yüz nəfərdən başlayaraq minlərlə etirazçının ölümünə səbəb olmuşdu. O gündən sonra Tyananmen hadisələri Çində demokratiya və insan haqları uğrunda hərəkatın rəmzinə çevrilib.
